Ердоған “X” платформасында жариялаған жазбасында: «Бүгін Америка Құрама Штаттарының Президенті, қадірлі досым Дональд Трамппен телефон арқылы өткізген әңгімеміз өте пайдалы, мазмұнды және шынайы өтті», – деп жазды.
Ол сонымен қатар «Жақын арада досым Трамппен бетпе-бет жүздесуді үміт етемін», – деп, бұл кездесулердің екі ел үшін де игілікті нәтижелер әкелуін тілейтінін айтты.
Президент Ердоған екіжақты байланыстарды, әсіресе қорғаныс өнеркәсібі мен сауда саласында нығайту жолындағы ортақ ерікті тағы да растағандарын мәлімдеді.
Екі көшбасшы Түркия мен АҚШ қатынастарының болашағы, аймақтық және жаһандық оқиғалар секілді әртүрлі тақырыптарды талқылады.
Газадағы гуманитарлық дағдарыс мәселесіне тоқталған Ердоған жағдайдың өте күрделі екенін айтып, үздіксіз гуманитарлық көмектің қажеттігін ерекше атап өтті.
Тұрақты бейбітшілік үшін ынтымақтастық
Ердоған әңгіме барысында Трамптың қақтығыстарды тоқтатуға бағытталған көзқарасын қолдайтынын білдіріп, Иранмен келіссөздердің қайта басталуы мен Ресей–Украина соғысының аяқталуына қатысты бастамаларды оң қабылдайтынын айтты.
«Президент Трамптың жаһандық деңгейдегі қақтығыстар мен соғыстарды тоқтатуға бағытталған күш-жігерін жоғары бағалайтынымды жеткіздім. Түркия өңірімізде бейбітшілік, тұрақтылық және қауіпсіздік орнауы үшін қажетті қолдауға дайын», – деді Ердоған.
Түркия Президенті: «Қадірлі досымды жақын арада Түркияда қарсы алуға қуанышты болатынымды айттым, ал өзі бізді АҚШ-қа шақырды», – деді.
Сирия мәселесіне де тоқталған Ердоған Түркияның елдің аумақтық тұтастығын қорғауға және ондағы тұрақтылықты қамтамасыз етуге деген ұстанымын тағы да растады. Сонымен қатар АҚШ-тың Сирияға салынған санкцияларды жеңілдету қадамдары өңірлік әрі жаһандық бейбітшілікке үлес қосуы мүмкін екенін атап өтті.
Мәлімдемеде Ердоғанның Трампты Түркияға ресми сапармен келуге шақырғаны айтылды.
Өз кезегінде АҚШ Президенті Дональд Трамп Ердоғанмен әңгімесін «өте жақсы және нәтижелі» деп сипаттап, Ресей мен Украина арасындағы соғысты тоқтату үшін Түркия Президентімен бірлесіп жұмыс істеуге асық екенін жеткізді.
Сондай-ақ Трамп Ердоғанның Вашингтонға келетінін мәлімдеді.
