Украина билігінің мәліметінше, үш күндік атысты тоқтату мерзімі аяқталғаннан кейін сейсенбі күні Ресей күштері Киевке дрондармен шабуыл жасады.
Киев әскери әкімшілігінің басшысы Тимур Ткаченко “Telegram” желісінде «Қарсыластардың дрондары дәл қазір Киев аспанында. Сиреналар тоқтағанға дейін қауіпсіз жерде болыңыздар», – деп жазды.
Киев облыстық әскери әкімшілігі тұрғындарды баспаналарда қалуға шақырып, аймақта әуе қорғаныс жүйелері іске қосылуы мүмкін екенін хабарлады.
АҚШ президенті Дональд Трамп Ресейдің 9–11 мамыр аралығындағы Екінші дүниежүзілік соғыстағы жеңіс мерекесіне бірнеше сағат қалғанда жариялаған үш күндік атысты тоқтату режимі 2022 жылдың ақпанынан бері жалғасып келе жатқан соғыста «бітімнің бастамасы» болады деп үміт білдірген еді.
Украина мен Ресей атысты тоқтату режимін бұзған «бейбіт тұрғындарға қарсы шабуылдар» үшін бір-бірін айыптады.
