Түркияның Америка Құрама Штаттарындағы Елшісі Седат Өнал сәрсенбі күні Вашингтон қаласында сенатор Элисса Слоткинмен кездесті. Екі тарап та кездесуді «нәтижелі» деп бағалады.

Түркия Елшілігі “X” әлеуметтік желісінде былай деп жазды: «Түркия мен АҚШ арасындағы ортақ мүдделер, екіжақты ынтымақтастық, сондай-ақ өңірлік және халықаралық күн тәртібіндегі өзекті мәселелер талқыланды».

Елшіліктің мәліметінше, Өнал мен Слоткин екі ел арасындағы диалог пен үйлестіруді сақтаудың маңызын да атап өтті.

Кездесуге қатысты өзге мәлімет жарияланған жоқ.

F-35 бағдарламасы

Президент Режеп Тайып Ердоған Түркияны АҚШ жетекшілік ететін F-35 жойғыш ұшақтары бағдарламасына қайта қабылдау жөніндегі үндеуін қайталаған болатын. Оның айтуынша, бұл қадам Вашингтонмен қарым-қатынастарды нығайтып, НАТО-ның қауіпсіздік архитектурасын қолдайды.

“Bloomberg” агенттігіне берген жазбаша мәлімдемесінде Ердоған Түркияның бағдарламадан шығарылуын «әділетсіз» деп атап, Дональд Трамптың АҚШ президенттігіне қайта оралуы екіжақты қатынастарды «неғұрлым орынды және сындарлы негізде» қайта құруға мүмкіндік беретінін айтты.

Ол Түркияның F-35 ұшақтарын сатып алуы «маңызды әрі қажет» екенін атап өтіп, сонымен қатар F-16 ұшақтарын сату жөніндегі келіссөздердің, көптен бері жалғасып келе жатқан Halkbank ісінің, сондай-ақ АҚШ-тан Түркияға сұйытылған табиғи газ (СТГ, LNG) жеткізілімін арттыруға бағытталған келіссөздердің жалғасып жатқанын мәлімдеді.