Непалдың Қытай шекарасына жақын аймағында болған су тасқыны мен көшкін салдарынан туристер мен жолаушыларды, сондай-ақ әскерлер мен полиция қызметкерлерін қосқанда кемінде 384 адамның із-түзсіз жоғалғаны хабарланды. Билік өкілдері кемінде 157 адамның қаза тапқанын мәлімдеді.
Полицияның хабарлауынша, сәрсенбі күні Непал мен Қытайдың Тибет аймағы арасындағы Гималай шекаралық өңірін шарпыған су тасқынынан қаза тапқандар саны 157-ге жеткен.
Непалдың Сыртқы істер министрі Сишир Ханал парламентте жасаған мәлімдемесінде су тасқыны әскери және полиция казармаларын шайып кеткеннен кейін шенеуніктер, әскерилер мен полиция қызметкерлерінің де жоғалғандар қатарында екенін айтты.
Непалдың Туризм жөніндегі кеңесі мәлімдемесінде 384 адамның із-түзсіз жоғалғандар тізіміне енгізілгенін хабарлады.
Туризм кеңесі: «Билік апаттан зардап шеккен аймақтарда болған немесе сол өңірлер арқылы өткен туристер мен жолаушылардың қайда екенін анықтау үшін жұмыс жүргізіп жатыр», — деп мәлімдеді.
Ханалдың айтуынша, Расува ауданында су тасқыны казармаларды шайып кеткеннен кейін 29 полиция қызметкері мен Непал армиясының 44 сарбазынан да хабар жоқ.
Үкіметтің алдын ала есебі бойынша, 19 көпір қирап, 40 шақырым жол бүлінген және 13 су электр станциясы зақымданған.
Сондай-ақ шамамен 200 жүк көлігін тасқын су ағызып әкеткен.
Жойқын апат
Ханалдың айтуынша, сәрсенбі күні шекара маңында болған жер сілкінісінен кейін қар көшкіні жүріп, салдарынан Қытайдың Тибет аймағындағы мұздық көлдер арнасынан шыққан.
Бейжің бұл өңірді «Сицзан автономиялық ауданы» деп атайды.
«Су тасқыны салдарынан көптеген су электр станциясы, мемлекеттік ғимараттар мен жол инфрақұрылымы толығымен қирады», — деді Ханал.
АҚШ Геологиялық қызметінің мәліметінше, Қытайдың Тибет аймағымен шекаралас Непалдың Кодари ауылында жергілікті уақытпен сағат 08:37-де магнитудасы 4,4 болатын жер сілкінісі тіркелген.
Шекараның екі жағында да ауқымды іздестіру-құтқару жұмыстары басталды.
Із-түзсіз жоғалғандардың арасында Непал, Үндістан, Ұлыбритания, Оңтүстік Африка, Австралия және Нидерланд азаматтары бар. Тағы бірқатар адамның қай елдің азаматы екені әзірге белгісіз.
Оңтүстік Кореяның «Yonhap News» агенттігі елдің Сыртқы істер министрлігіне сілтеме жасап, Оңтүстік Кореяның сегіз азаматынан хабар жоқ екенін, тағы 10 адамның Непалдағы су тасқыны салдарынан жолда қалып қойғанын хабарлады.
Ханал су тасқыны Расува, Дхадинг және Читван аудандарына үлкен залал келтіргенін айтты.
