Түркия жұма күні Израильдің ұлттық барлау қызметі «Моссад» үшін тыңшылық жасады» деген айыппен жекеменшік детективтің қамауға алынғанын хабарлады. Қауіпсіздік органдарының дерегіне сәйкес, күдікті Стамбулда прокурорлар мен полицияның бірлескен операциясы кезінде ұсталған.
Ұлттық барлау қызметі күдіктінің Серкан Чичек екенін анықтап, оның «Метрон іс-қимылы» кодты операция кезінде қолға түскенін мәлімдеді.
Қауіпсіздік өкілдері Чичектің «Моссад» үшін жұмыс істегенін және Израильдің Онлайн операциялар орталығының мүшесі Файсал Рашидпен байланыста болғанын айтты.
Чичек Файсал Рашидтің тапсырмасы бойынша Израильдің Таяу Шығыс саясатына қарсы шыққан палестиналық бір белсендіге Стамбулда жасырын бақылау жүргізгенін мойындаған.
Ұлттық барлау ұйымының дерегінше, Чичек қарызға белшесінен батқан соң есімін өзгертіп, қызметін тастап, 2020 жылы «Pandora» детективтік агенттігін құрған. Оның шын есімі - Мұхаммет Фатих Келеш.
Сондай-ақ Чичектің Израиль үшін тыңшылық жасап, 19 жылға сотталған Муса Кушпен және мемлекеттік деректерді жекеменшік детективтерге сатқан адвокат Тугрылхан Диппен байланысқаны хабарланды.
Күдіктінің ақысы криптовалютамен төленген
Билік өкілдерінің айтуынша, Чичек детективтік қызметке кіріскеннен кейін «Моссадтың» назарына іліккен. 31 шілде күні Файсал Рашид онымен «WhatsApp» арқылы байланысқа шығып, өзін шетелдік заң фирмасының қызметкері ретінде таныстырған.
Рашид Чичекке Стамбулдың Башакшехир ауданында тұратын палестиналық бір белсендіге төрт күн бойы бақылау жүргізуді тапсырған. Хабарға қарағанда, Чичек бұл тапсырма үшін 1 тамызда криптовалютамен 4 мың доллар алған.
Чичек бақылауға алынатын кісінің есімін және оның палестиналық белсенді екенін интернет арқылы білген. Ол серіктесі Муса Куштың тыңшылық жасағаны үшін түрмеге жабылғанын біле тұра, тапсырманы орындауға келіскен.
Ресми дерекке сәйкес, Чичек Рашид берген мекенжайға барған, бірақ бақылаудағы кісіні таба алмаған. 1-2 тамыз күндері пәтер жалдау сылтауымен тұрғын үй кешеніне кіріп, барлау жүргізсе де «Моссад» сұратқан мәліметтерді жинай алмаған.
Билік өкілдерінің сөзінше, израильдік агент 3 тамыз күні Рашид Чичекпен байланысын үзген.
