Он мыңдаған адам Стамбулдың түкпір-түкпірінен Палестинаны қолдау және палестиналықтарға қарсы соғысты тоқтатуды талап ету үшін жиналды. «Үнсіз қалмаймыз, Палестинаны ұмытпаймыз» атты шеруді Гуманитарлық көмек альянсы мен Ұлттық ерік-жігер платформасы ұйымдастырып, 400-ден астам үкіметтік емес ұйымның басын қосты.
Бейсенбі күні шерушілер Айя-София мешіті, Сұлтанахмет, Фатих, Сүлеймание және Еминөнүндегі Жаңа мешіт сияқты ірі мешіттерде таң намазын оқыды. Кейін Галата көпіріне қарай бет алды. Олар Түркия мен Палестина туларын желбіретіп, кефие тағып, «Стамбулдан Газаға, қарсылыққа мың сәлем!» және «Палестина азат болсын!» деп ұрандатты.
Жиналған қауымға үн қатқан Билал Ердоған азаматтар арасындағы бірліктің күшейгенін атап өтіп, «Жыл сайын шеруге қатысушылардың саны көбейіп келеді, бүгін бір ұлт ретінде ортақ құндылықтарымыздың мықты күшін сезінудеміз», - деді. Ол Иерусалим мен палестиналықтар үшін азаттық тілеп, дұға жасады.
Шеруге Түркияның Әділет және даму партиясының Стамбулдағы төрағасы Абдуллах Өздемир, сондай-ақ «ÖNDER» қоғамының төрағасы Абдуллах Джейлан бастаған діни және азаматтық көшбасшылар қатысты.
Қатысушылар «Палестина үшін әділет ˗ әлем үшін ар-ождан» деген жазуы бар плакаттар ұстап, Израильдің қатаң әрекеттерін айыптайтын ұрандарды жиі айтты. Еріктілер жол бойында шай, сорпа және симит таратты.
Полиция шеру бағыты бойында қатаң қауіпсіздік шараларын қолданды. Ұйымдастырушылар митингті палестиналықтарға көрсетілген қолдаудың бейбіт көрінісі деп бағалады.
Көптеген қатысушы 2026 жыл әділет, бейбітшілік әкеліп, Газадағы азаптың тоқтауына үміт білдірді. Сондай-ақ бұл шараның Стамбулдан бүкіл әлемге жолданған «ынтымақ үндеуі» екенін айтты.
