Мелони: «Италия Израильмен қорғаныс келісімін уақытша тоқтатады»
Италия үкіметі ел ішіндегі қысымның күшеюі мен бірқатар қауіпсіздік оқиғасына байланысты Израильмен әскери ынтымақтастықты тоқтату туралы шешім қабылдады.
Италия премьер-министрі Джорджа Мелони сейсенбі күні жасаған мәлімдемесінде елінің Израильмен қорғаныс келісімін уақытша тоқтатқанын хабарлады.
Верона қаласындағы іс-шарада сөз алған Мелони: «Үкіметіміз жағдайды ескере отырып, Израильмен жасалған қорғаныс келісімінің автоматты түрде жаңартылуын тоқтата тұру туралы шешім қабылдады», – деді.
Аталған келісім әскери техника мен технологиялық зерттеулер саласындағы ынтымақтастықты қамтиды. Италияның Израильмен қарым-қатынасына байланысты наразылықтар күшейгендіктен келісімді тоқтату шешімі қабылданды. Газадағы соғыс пен басып алынған Палестина аумақтарындағы зорлық-зомбылықтың күшеюіне байланысты наразылық өршіп отыр.
Өткен аптада Италия Ливанда Израиль күштері БҰҰ-ның бітімгерлік миссиясына тиесілі көлікке оқ атып, оны зақымдағаннан кейін Израиль елшісін Сыртқы істер министрлігіне шақырды. Аталған миссия құрамында италиялық қызметкерлер де болған.
Ал қаңтар айының соңында Рим басып алынған Батыс Шерияда екі италиялық әскери полиция қызметкеріне қоқан-лоқы көрсетілгеннен кейін Израиль елшісін қайта шақырған болатын.
Италия Сыртқы істер министрлігінің мәліметінше, дипломатиялық көлікпен жүрген офицерлерді қарулы заңсыз қоныстанушылар тізерлетіп, күштеп жауап алған.