Түркия Ұлттық қорғаныс министрлігі Израильдің Сириядағы Әбу Зухур әуе базасына жасаған шабуылына дейін де, шабуыл кезінде де онда түрік әскери делегациясы болмағанын мәлімдеді.
Ұлттық қорғаныс министрлігінің Баспасөз және қоғаммен байланыс жөніндегі кеңесшісі әрі министрлік өкілі Зеки Актүрік апта сайынғы баспасөз мәслихатында мәлімдеме жасады.
Актүрік Израильдің Газа жоспарын қабылдамай, аймақта шабуылдарын жалғастыруы бейбітшілік орнатуға кері әсер етіп отырғанын атап өтті.
«Израиль қол қойылған негіздемелік келісімге қарамастан, Ливанның оңтүстігіндегі шабуылдары мен әскери әрекеттерін жалғастырып келеді. Ал Сирияға жасаған соңғы шабуылдары елдің аумақтық тұтастығына, егемендігі мен бірлігіне қауіп төндіруде. /…/ Халықаралық қауымдастық Израильдің аймақтағы бейбітшілік пен тұрақтылыққа қатер төндіретін әрекеттеріне қарсы халықаралық құқық пен гуманитарлық құндылықтарды басшылыққа алып, нақты шара қабылдауы қажет екенін қайталаймыз», – деді ол.
Зеки Актүрік Израильдің 18 тамызда Сириядағы Әбу Зухур әуе базасына жасаған шабуылына дейін де, шабуыл кезінде де онда түрік әскери делегациясы болмағанын баса айтты.
«Біздің басты мақсатымыз – аймақтың одан әрі қақтығыс пен тұрақсыздыққа тап болуына жол бермей, бейбітшілік пен қауіпсіздікті тұрақты ету. Осы тұрғыда Сирияның егемендігі мен аумақтық тұтастығын қорғауға, елде тұрақты әрі қауіпсіз жағдай қалыптастыруға бағытталған жұмысымыз бен қолдауымыз табандылықпен жалғаса береді», – деді Актүрік.
