Куәгерлердің айтуынша, кеше Израиль армиясы басып алынған Батыс Шериядағы Мезра аш-Шаркия елді мекенінде бес тарихи жәдігерді тәркіледі.
Куәгерлер Израиль әскерінің Израиль азаматтық әкімшілігі бөлімшелерімен бірге елді мекеннің таулы аймағына басып кіріп, археологиялық алаңнан Византия дәуіріне тиесілі бес тарихи бағанды алып кеткенін хабарлады.
Израиль медиасында жарияланған соңғы ақпаратта бағандардың тәркіленуіне палестиналықтардың бұл аймақта құрылыс жүргізіп, тарихи ескерткіштерге зиян келтіргені туралы айыптаулар себеп болғаны алға тартылды.
Палестина Туризм және Ескі жәдігерлер министрі Хани әл-Хаяк Израиль шабуылдарының 316 археологиялық және тарихи нысанды толық немесе жартылай жойғанын, бұл әрекеттердің «Палестина тарихын жоюды мақсат ететін соғыс қылмыстары» екенін атап өтті.
Палестина Азаттық ұйымы жанындағы Қабырға және қоныстарға қарсы күрес комиссиясының басшысы Муайяд Шаабан бұған дейін Израильдің Батыс Шерияда Наблус маңындағы Себастия және Бурка елді мекендерінде археологиялық орындарды қорғау сылтауымен 4 600 шаршы метр жерді тартып алуды жоспарлап отырғанын мәлімдеген болатын.
