БҰҰ Бас хатшысының гуманитарлық мәселелер жөніндегі орынбасары және Төтенше көмек үйлестірушісі Том Флетчер жексенбі күні “X” желісінде: “Тавилада сөзбен айтып жеткізгісіз қасірет. Қашып шыққандардың жартысынан көбі – балалар”, деп жазды.

Флетчердің айтуынша, “Шабуылдан аман қалып, лагерьге кірген жаралы әйел жанында құрдасының аштықтан әбден әлсіреген баласын ұстап келе жатты. Олар әлемнен көмектің келіп келмейтінін сұрайды.

БҰҰ гуманитарлық агенттігі “Facebook” арқылы Флетчердің Тавилада болғанын және “бар болғаны бірнеше апта бұрын Фаширден қашқан әйелдермен кездескенін” хабарлады.

БҰҰ Гуманитарлық мәселелерді үйлестіру басқармасының дерегінше, Флетчер Батыс Дарфурдағы Джунейна мен Орталық Дарфурдағы Залингейді де аралаған.

Аптаның басында Флетчер елдің шығысындағы Порт-Суданға барып, Суданның Өтпелі Егемендік кеңесінің төрағасы Абделфаттах әл-Бурханмен кездесті.

Алаңдатарлық деректер

Халықаралық көші-қон ұйымы 26 қазаннан бері Фашир мен оған жақын ауылдардан қоныс аударғандардың жалпы саны 99 000-нан асқанын болжайды.

Өткен айда Жедел Қолдау Күштері Солтүстік Дарфурдың астанасы Фаширді басып алып, қырғын жасады деген айыптаулар түскен еді.

Бұл топ Суданның 18 штатының ішіндегі бес Дарфур штатының барлығын бақылауда ұстап отыр, ал армия астана Хартумды қоса алғанда қалған 13 штаттың басым бөлігін басқарады.