Франция Президенті мен жұбайының адвокаты АҚШ-тың консервативті инфлюенсері Кандейс Оуэнс Франция Президенті Эммануэль Макронның жұбайы Брижит Макрон ер адам болып туған деген айыптауларын жалғастыра беретін болса, "елеулі" өтемақы талап етілетінін мәлімдеді.

Адвокат Том Клэр “CNN” арнасына берген сұхбатында сәрсенбі күні Делавэр сотына Макрондар атынан берілген жала жабу ісі Оуэнспен бір жылға созылған нәтижесіз диалогтан кейін "шын мәнінде соңғы амал" болғанын айтып, Оуэнстен "дұрысын жасап, шындықты айтуын және бұл жалған ақпаратты таратуды тоқтатуын" талап еткендерін жеткізді.

"Әр жолы Оуэнс Макрон жұбын мазақ етті, біздің күш-жігерімізді менсінбеді", - деді Клэр. "Енді жетер, оны жауапқа тартатын уақыт келді", - деп қосты ол.

Клэрдің айтуынша, Оуэнске қарсы шағым Брижит Макронның "әйел ретінде туғанын және әрқашан әйел болғанын" дәлелдейтін "кең ауқымды айғақтарды" қамтиды. "Біз келтірілген зиян үшін өтемақыны сотта талап етеміз, бірақ егер Оуэнс сот отырысына дейін бұл мәлімдемелерді жалғастыра берсе, талап етілетін өтемақы мөлшері айтарлықтай жоғары болады", - деді ол.

Франция Президентінің кеңсесі бұл мәселеге қатысты әзірге түсініктеме берген жоқ.

Жұп 2007 жылы үйленген, ал Эммануэль Макрон 2017 жылдан бастап Франция Президенті қызметін атқарып келеді.

Олар алғаш рет Эммануэль Макрон оқушы, ал Брижит Макрон мұғалім болып жұмыс істеген лицейде танысқан. Ол кезде Брижит Макрон үш баланың анасы, әрі Брижит Озиер есімді тұрмыстағы әйел болған.

Эммануэль Макрон мектепті бітіру үшін Парижге көшті, алайда Брижитке үйленуге уәде берді. Кейін Брижит Парижге көшіп келіп, ажырасты және соңында екеуі үйленді.