Түркия президенті Режеп Тайып Ердоған Анкарада өткен салтанатты рәсімде БҰҰ-ның бас хатшысы Антониу Гутерришке Ататүрік атындағы халықаралық бейбітшілік сыйлығын табыстады.
Ердоған бейсенбі күнгі рәсімде, БҰҰ басшысының бейбітшілік пен көпжақты ынтымақтастықты дамытуға қосқан үлесін жоғары бағалап, Түркияның халықаралық ұйымды күшейтуге бағытталған ұстанымы өзгермейтінін атап өтті.
“Әділетсіздік болса, дамуға да, бейбітшілікке де, тұрақтылыққа да жету мүмкін емес деп сенетін көшбасшы ретінде біз БҰҰ-ны бәрін қамтитын ұйым ету жолындағы жұмысын барынша қолдауға дайынбыз”, -деді ол.
Президент сондай-ақ Анкараның Таяу Шығыста күшейіп келе жатқан зорлық-зомбылықтың алдын алуға бағытталған дипломатиялық әрекеттеріне де тоқталды. Ердоған Иранға байланысты зорлық-зомбылықтың ушығуы өңірді кең ауқымды апатқа алып келуі мүмкін екенін ескертіп, Түркия қақтығыстың одан әрі таралмауы үшін белсенді дипломатиялық жұмыс жүргізіп жатқанын айтты.
Президент АҚШ, Израиль мен Иран арасындағы диалогқа кедергі жасалғанына қарамастан, Анкара дипломатиялық шешімдерді сабырмен әрі табанды түрде жалғастыратынын жеткізді.
