Бұл ақпаратты жексенбі күні Ресейдің мемлекеттік ақпарат агенттігі “РИА Новости” мен ғалымдар хабарлады.

“РИА”  агенттігі Камчаткадағы Жанартау атқылауына әрекет тобының жетекшісі Ольга Гиринаның: "Бұл — Крашенинников жанартауының 600 жыл ішінде тіркелген алғашқы атқылауы,"-  сөзіне сілтеме жасады.

Гирина сәрсенбі күні Француз Полинезиясы мен Чили сияқты алыс аймақтарда цунами ескертуіне себеп болған жер сілкінісі Камчатка түбегіндегі ең белсенді Ключевской мен Крашенинников жанартауларының бір мезгілде атқылауымен байланысты болуы мүмкін екенін айтты.

Ресей Ғылым академиясының жанындағы Вулканология және сейсмология институтының “Telegram” арнасында Гирина Крашенинников жанартауында 1463 жылдан бері ешқандай атқылау тіркелмегенін мәлімдеді.

Ресей Төтенше жағдайлар министрлігінің Камчаткадағы бөлімшесі атқылаудан кейін 6 000 метр биіктікке дейін жеткен күл бұлты көтерілгенін хабарлады.

Крашенинников жанартауының биіктігі — 1 856 метр.

Министрлік “Telegram”-да жариялаған хабарламасында: "Күл бұлты шығысқа, Тынық мұхиты бағытына қарай қозғалды. Ол бағытта орналасқан елді мекендер жоқ," - деп мәлімдеді.

Сонымен қатар министрлік жанартау атқылауынан кейін авиация үшін жоғары қауіп деңгейін білдіретін қызғылт сары авиациялық код жарияланғанын, бұл ұшақтар үшін қауіптің артқанын білдіретінін атап өтті.