Түркия Ұлттық қорғаныс министрлігі Түркия, Пәкістан және Сауд Арабиясы арасында жасалған қорғаныс келісімі ортақ әскери мүмкіндіктерді дамытуға бағытталғанын және ешбір елді ортақ жау немесе қарсылас ретінде қарастырмайтынын мәлімдеді.

Министрліктің баспасөз брифингінде сөз сөйлеген Баспасөз және қоғаммен байланыс жөніндегі кеңесші, контр-адмирал Зеки Актүрік келісімнің негізгі мақсаттары өңірлік қауіпсіздік пен тұрақтылыққа үлес қосу, әскери ынтымақтастықты дамыту және ықтимал дағдарыс жағдайларында бірлесіп әрекет ету мүмкіндігін күшейту екенін атап өтті.

Актүрік: «Аталған келісім қорғаныс мақсатында жасалған және ешбір елді ортақ жау немесе қарсылас ретінде қарастырмайды», – деді.

Әскери ынтымақтастықты кезең-кезеңімен дамыту жоспарланып отырғанын айтқан Актүрік: «Осы аяда алдымен командалық-штабтық және далалық жаттығулар өткізу, кейінгі кезеңдерде құрлық, теңіз, әуе күштері, әуе қорғанысы мен ұшқышсыз жүйелерді қамтитын бірлескен оқу-жаттығулар ұйымдастыру көзделіп отыр», – деді.

Қорғаныс өнеркәсібі саласындағы ынтымақтастық келісімнің маңызды бөлігі екенін атап өткен Актүрік: «Бұл бағытта өнімдер мен жүйелерді сатып алумен ғана шектелмей, оларды бірлесіп әзірлеу және өндіру, технологиялық ынтымақтастықты дамыту, сондай-ақ тұрақты техникалық қызмет көрсету мен логистикалық қолдауды қамтамасыз ету мақсат етіледі», – деді.

Әсіресе ұшқышсыз және автономды жүйелер, радиоэлектрондық күрес пен жасанды интеллектке негізделген мүмкіндіктер ынтымақтастықтың басым бағыттарының қатарына енгізілгені айтылды.

Мекке ортақ қорғаныс келісімінің халықаралық қауіпсіздік архитектурасындағы орнына тоқталған Актүрік: «Мекке ортақ қорғаныс келісімі НАТО-ға балама да, бәсекелес те емес. Ол өңірлік қауіпсіздік пен тұрақтылыққа үлес қоса отырып, халықаралық қауіпсіздік архитектурасын толықтыратын тетік», – деді.