Түркия Республикасының Мемлекеттік темір жолдары (TCDD) мен Сауд Арабиясының Мемлекеттік темір жолдары (SAR) темір жол күтімі, жөндеу, инфрақұрылымды дамыту, қозғалысты басқару, білім беру мен кеңес беру салаларында меморандумға қол қойды.
Келісімге дүйсенбі күні Сауд Арабиясында өткен кездесулер барысында «TCDD» бас директоры Вейси Курт пен «SAR» бас директоры Бешар бин Халид әл-Мәлик бастаған делегациялардың қатысуымен қол қойылды. Бұл жаңалықты Түркия Көлік министрлігі «Nsosyal» арқылы хабарлады.
Министрліктің мәлімдемесінде: «Кездесуде темір жол күтімі мен жөндеу, инфрақұрылымды жетілдіру, қозғалысты басқару, білім беру мен кеңес беру сияқты салаларда ұзақ мерзімді ынтымақтастық мүмкіндіктері қарастырылды», - делінген.
Кездесу нәтижесінде екі елдің мемлекеттік темір жолдары арасында «Темір жол саласындағы ынтымақтастықты дамыту туралы меморандумға» қол қойылды.
Сондай-ақ мәлімдемеде: «Бұл ынтымақтастық арқылы «TCDD» халықаралық темір жол желісіндегі серіктестікті нығайтуды және Түркияның жаһандық көлік дәліздеріндегі жетекші орнын одан әрі бекемдеуді көздейді», - делінген.
Темір жол саласында ынтымақтастықты дамыту
Түркия соңғы уақытта Араб әлемінде темір жол саласындағы ынтымақтастық желісін кеңейтіп келеді. Түркия Көлік министрі Абдулкадир Уралоғлының айтуынша, Түркия, Сирия және Иорданияның көлік министрлері аймақтық қатынастарда тарихи қадам саналатын Хижаз темір жолын қайта жандандыру жөнінде келісімге келген.
Министрдің мәлімдеуінше, Сириядағы темір жолдың бітпеген 30 шақырымдық үстіңгі құрылысы Түркияның қолдауымен аяқталатын болады.
Сонымен қатар Уралоғлы Иордания тарапының Сириядағы локомотивтердің күтім, жөндеу және пайдалану бойынша техникалық мүмкіндіктерін зерттейтінін, ал Түркияның Акаба порты арқылы Қызылтеңізбен байланысын нығайту мақсатында бірлескен техникалық жұмыс жүргізетінін атап өтті.
