Украина парламенті АҚШ-пен көптен күткен кен өндіру келісімін мақұлдау үшін дауыс берді. Киев бұл келісім Вашингтонның болашақтағы әскери қолдауына жол ашады деп үміттенеді.

Өткен аптада қол қойылған келісім Вашингтон мен Киевтің Украинаның табиғи ресурстары мен пайдалы қазбаларын бірлесіп игеруін көздейді. Киев пен Вашингтон келісімге ақпан айында қол қоюды жоспарлаған болатын, бірақ Ақ Үйде АҚШ президенті Дональд Трамп пен Украина президенті Владимир Зеленский арасындағы келіспеушілік келіссөзге кедергі келтірді.

Келісім Вашингтонның ешқандай қауіпсіздік кепілдігін қамтымайды, бірақ АҚШ Украинада коммерциялық пайданы кеңейту Ресейге қарсы қорған деген пікірде.

Зеленский келісімді қарым-қатынастардағы «жаңа бастама» деп сипаттап, нәтижеде бұл қауіпсіздікті қолдауға әкеледі деп үміттенеді.

«Қазір бұл қауіпсіздік саласындағы ынтымақтастық үшін берік іргетас және ұзақ мерзімді перспективада Украина мен АҚШ-қа өзара тиімді экономикалық ынтымақтастықты кеңейтуге мүмкіндік береді», - деп жазды Зеленский «X» платформасындағы жазбасында.

Мақұлдау 347 депутаттың 338 дауысымен қабылданды, ешкім қарсы дауыс берген жоқ.

Ақшаның қайтарылуы

Трамп бастапқыда бұл келісімді Джо Байден кезінде Украинаға берген әскери көмектің «қайтарымы» деп сипаттады. Алайда Киев келісім екі жаққа «тең» жеңілдіктер беру үшін қайта жасалғанын айтады.

Келісім бұрынғы қарыздармен байланысты емес және бірлескен Қалпына келтіру қорын құрады. Оның кірісі алғашқы 10 жылда тек Украинаға инвестицияланады.

Вашингтонның жаңа әскери көмегін бірлескен инвестициялық қордың жарнасы ретінде санауға болады. Келісімнің нақты пайдасын қашан көретіндері белгісіз.

Шығыста қақтығыс жалғасуда және Украинаның көптеген ресурстық кен орыны ресейлік әскерилер басып алған аймақтарда.

Киевтің ең үлкен қолдаушысы Вашингтонның айтуынша егер Украина мұндай қолдауды жалғастырғысы келсе, келісім өте маңызды.