Билік өкілдерінің хабарлауынша, Техастағы кенеттен болған су тасқынынан қаза тапқандар саны кемінде 119 адамға жеткен, ал 170-тен астам адамды іздеу жұмыстары әлі де жалғасуда.
Ең көп зардап шеккен Керр округінде 59 ересек пен 36 бала, яғни барлығы 95 адамның қаза тапқаны тіркелді.
Билік әлі 27 адамның аты-жөні анықталмағанын хабарлады. Қалған қайғылы жағдайлар көршілес аудандарда болған.
Құтқару операциялары кеңейген сайын, штаттың төтенше жағдай туралы ескерту жүйесіне қатысты сын күшейе түсті.
«Texas Public Radio» және «KSAT» жүргізген зерттеулерге сәйкес, таңғы сағат 4:22-де жіберілуі тиіс болған жаппай ескерту хабарламасы бекітілу мәселесіне байланысты кешіктірілген. Соның салдарынан кейбір тұрғындар су тасқыны қаупі туралы бірнеше сағат өткен соң ғана хабардар болған.
Билік өкілдерінің мәлімдеуінше, тек Керр округінің өзінде 161 адам жоғалып кеткен. Із-түзсіз жоғалғандар қатарында Гвадалупе өзені маңындағы «Camp Mystic» атты қыздарға арналған жазғы лагерьдің бес оқушысы мен бір тәрбиешісі бар.
Үйлеріне оралған тұрғындар көп нәрсенің қирағанын көрді. Билік өкілдері іздестіру топтарының жұмысына кедергі келтірмеуді ескертіп, қирандыларды тазарту үшін ауыр техниканың қолданылып жатқанын атап өтті.
Керр округінің шерифі Ларри Лейта: «Әркім қолынан келген көмегін көрсетуі тиіс», - деді. Сондай-ақ ол: «Жоғалған жақындарын іздеп жүрген отбасыларға, жұртшылыққа және мені осы қызметке сайлаған азаматтарға жауап берілуі керек», - деп қосты.
Дабыл жүйесінің болмауы және байланыс қызметіндегі тұрақсыздық наразылықты арттыруда.
2015 жылдан бері Керр округі су тасқыны туралы ескерту жүйесін орнату үшін грант алуға өтініш беріп келеді.
Жексенбі күні Трамп әкімшілігі су тасқынын «ірі апат» деп жариялап, құтқару жұмыстарына көмектесу мақсатында федералды ресурстарды жұмылдырды.
Техас штатының губернаторы Грег Эбботт сәрсенбі күні жасаған мәлімдемесінде су тасқынына қарсы штаттан 2 200-ден астам қызметкер және 1 200 техника мен құрал-жабдық жұмылдырылғанын айтты.
Штаттың 20-дан астам мекемесі құтқару және қолдау операцияларына қатысуда.
