Ресейде «Ozon» электронды сауда платформасына тиесілі үш өңірдегі қойманың жұмысы дрон шабуылына байланысты уақытша тоқтатылды. Дағыстандағы нысанда өрт шықты.

«Ozon» компаниясының жазбаша мәлімдемесінде Ресейдің Дағыстан аймағындағы Махачкала қаласында орналасқан логистикалық орталыққа дронмен шабуыл жасалғаны айтылды.

Мәлімдемеге сәйкес, нысандағы қызметкерлер эвакуацияланған. Алдын ала мәлімет бойынша бірнеше адам жарақат алған. Зардап шеккендердің жағдайы тұрақты.

Шабуылдан кейін шыққан өртті төтенше жағдай қызметтері сөндіруге кірісті, ал қойманың жұмысы уақытша тоқтатылды.

Сондай-ақ «Ozon» компаниясының Адыгейск және Невинномысск қалаларындағы қоймалары да түнде дрон шабуылы қаупіне байланысты эвакуацияланды.

Бұл нысандарда қызметкерлер зардап шекпеген, қоймалар мен тауарларға зақым келмеген. Алайда төтенше жағдай қызметтерінің жұмысына байланысты қоймалар уақытша жабылды.

Бұған дейін Украина Ресейдің тағы бір электронды сауда платформасы «Wildberries»-ке тиесілі қоймалар мен логистикалық нысандарға дрон шабуылдарын жасаған еді.