Норвегияның Нобель комитеті жұма күні 2025 жыл Нобель Бейбітшілік сыйлығының Венесуэла оппозициясының жетекшісі Мария Корина Мачадоға берілгенін хабарлады.
АҚШ президенті Дональд Трамп өзін бұл сыйлыққа лайық кандидат ретінде көрсетуге тырысқанымен, 58 жастағы Мачадо «Венесуэла халқының демократиялық құқықтарын ілгерілету жолындағы ерен еңбегі» үшін марапатқа лайық деп танылды.
Биылғы марапатқа барлығы 338 кандидат ұсынылған. Олардың 244-і жеке тұлға, ал 94-і ұйым.
Өткен жылғы Нобель Бейбітшілік сыйлығы Жапонияда атом бомбасының құрбандарынан құралған халық қозғалысы «Nihon Hidankyo» тобына берілген болатын. Бұл ұйым «ядролық қарудан азат әлем құру жолындағы күш-жігері және ядролық қарудың ешқашан қолданылмауы керектігін куәгерлермен дәлелдегені» үшін марапатталды.
1901–2024 жылдар аралығында Нобель Бейбітшілік сыйлығы 105 рет табысталып, оны 111 тұлға мен 31 ұйым иеленді. Барлығы 28 түрлі ұйым бұл сыйлыққа ие болған. Атап айтқанда, Халықаралық Қызыл Крест комитеті үш рет, ал БҰҰ Босқындар жөніндегі комитеті екі рет марапатталған.
Швед өнертапқыш Альфред Нобельдің өсиетіне сәйкес 1901 жылдан бастап табыстала бастаған Нобель сыйлығы бүгінгі таңда әлемдегі ең беделді марапаттардың бірі саналады.
Бұл марапат жыл сайын физика, химия, физиология немесе медицина, әдебиет және бейбітшілік салаларында беріледі, ал 1969 жылы Швецияның Орталық банкі экономика саласында Нобель сыйлығын тағайындаған.
