Болгария президенті Илияна Йотова елде 19 сәуірде кезектен тыс парламенттік сайлау өтетінін хабарлады.
Йотова өткен аптада Болгария Ұлттық банкі төрағасының орынбасары Андрей Гюровты кезекті парламенттік сайлауға дайындық жүргізуге жауапты уақытша үкіметтің басшысы етіп тағайындады. Бұл ЕО және НАТО мүшесі болып табылатын елде соңғы бес жыл ішінде өтетін сегізінші сайлау болмақ.
Бұған дейінгі үкімет экономикалық саясат пен сыбайлас жемқорлықпен күрестегі сәтсіздіктерге байланысты бірнеше аптаға созылған көше наразылықтарынан кейін 11 желтоқсанда отставкаға кеткен болатын.
Йотова сәрсенбі күні уақытша үкімет мүшелерін таныстырған Гюровпен кездесуден кейін өткен баспасөз мәслихатында «19 сәуірде сайлау өткізу туралы жарлыққа қол қоямын», — деді.
1 қаңтарда еуро аймағына қосылған Болгария парламенттің бытыраңқылығы салдарынан партиялардың тұрақты басқарушы коалициялар құра алмауына байланысты ұзақ уақыт бойы саяси тұрақсыздықты бастан кешіп отыр.
