Израильдің мемлекеттік телеарнасы «KAN» таратқан мәліметтерге қарағанда, 2025 жылдың басынан бері 16 израильдік сарбаз өз-өзіне қол жұмсаған. 2023 жылдың қазанында Газада геноцид басталғалы бері өз-өзіне қол жұмсаған сарбаздардың жалпы саны 54-ке жетті.
«KAN» телеарнасы тағы сегіз әскери қызметші, запастағы жеті сарбаз және бір кәсіби сарбаздың суицид жасағанын мәлімдеді. 2024 жылы 21 сарбаз, 2023 жылы 17 сарбаз өзіне қол жұмсаған.
«KAN» Газадағы құрлық операцияларына жұмылдырылған резервшілер арасында өз-өзіне қол жұмсау деңгейінің айтарлықтай артқанын баса айтты.
Сонымен қатар шамамен 3 770 сарбазға жарақаттан кейінгі стресс диагнозы қойылған. Израильдің медиа агенттігі қырғын басталғаннан бері жараланған 19 000 сарбаздың шамамен 10 000-ында психологиялық симптомдар бар екенін және Қорғаныс министрлігінің оңалту бөлімі арқылы емделіп жатқанын атап өтті.
Бұл жағдайды шешуге тырысқан Израиль армиясы сарбаздардың психологиялық төзімділігін арттыру үшін шеберлік сабақтарын ұйымдастырып, соғыс ардагерлерін әскери психологтарға жолдауда.
«Yedioth Ahronoth» басылымы әскери мәлімдемеге сілтеме жасап, резервтегі Ариэль Мейр Таманның жексенбі түні Израильдің оңтүстігіндегі үйінде өлі табылғанын хабарлады. Басылым сарбаздың өз-өзіне қол жұмсаған болуы мүмкін екенін және өлім себебін анықтау үшін әскери тергеу басталғанын жазды.
Әскери деректерге қарағанда, Газада қырғын басталғалы 895 израильдік сарбаз қаза тауып, 6134 адам жараланған. Армия әскер өлімін жасырғаны үшін сынға ұшырауда.
Геноцид
Израильдің Газаға жасаған шабуылдарында 60 мың палестиналық қаза тапты. Олардың басым көпшілігі әйелдер мен балалар.
Израиль шабуылдарын жалғастырып, Газа секторының көп бөлігін қирандыға айналдырды және бүкіл халықты көшірді.
Өткен қарашада Халықаралық қылмыстық сот Израиль премьер-министрі Беньямин Нетаньяху мен сол кездегі қорғаныс министрі Йоав Галлантты Газадағы соғыс қылмыстары мен адамзатқа қарсы қылмыстары үшін қамауға алуға ордер шығарды.
Израиль Палестинаға жүргізген аяусыз соғысы үшін Халықаралық сотта геноцид ісімен бетпе-бет келуде.
