БАҚ хабарлауынша, дүйсенбі күні “SpaceX” компаниясы Техас штатындағы Бока-Чика қаласында орналасқан “Starbase” ғарыш айлағынан “Starship” зымыранының 11-ші сынақ ұшуын сәтті жүзеге асырды.

Қайта пайдалануға болатын жүйе ретінде жасалған бұл мегазымыран “NASA”-ның болашақтағы “Artemis” миссияларында қолдануға бағытталған бір сағаттық сынақтан табысты өтті.

“NAS”A-ның уақытша әкімшісі Шон Даффи “X” платформасында: «Америкалықтардың Айдың оңтүстік полюсіне қонуына тағы бір үлкен қадам. Бүгінгі “Starship” сынағы — “Artemis” бағдарламамыз үшін аса маңызды жетістік», — деп жазды.

Ол сонымен қатар: «Біз “Artemis II” миссиясына дайындықты жалғастырып жатқанда әрбір ұшу “Artemis III” бойынша ілгерілеуімізді нығайтып, Қытайды Айға оралу жарысында артта қалдыруға көмектеседі», — деп қосты.

“SpaceX” компаниясы “Starship Version 2” прототипімен биыл бірнеше сынақ жүргізген болатын. Дүйсенбі күнгі ұшыру — осы нұсқаның қатарынан екінші табысты сынақ ұшуы. Бірінші сәтті ұшу тамыз айында өткен еді.

Бұған дейінгі үш сынақ кезінде ұшу барысындағы ақаулар мен жердегі жарылысқа әкелген сәтсіздіктер тіркелген.

“SpaceX” қазір “NASA”-ның 2027 жылға жоспарланған Айға қону миссиясына арналған ғарыш кемесін әзірлеу жарысында Қытаймен тікелей бәсекелесіп отыр.

“Starship” зымыранын Жер атмосферасына қайта кіру кезінде пайда болатын 1 426 °C-тан жоғары температурадан аман өткізу және байланыс үзілмей оралу тетіктерін табу аса маңызды. Компанияның мақсаты — аппаратты қауіпсіз қондырып, қайта ұшыруға мүмкіндік беру.

121 метр биіктігі мен 7 590 тонна тарту күшіне ие бұл мегарокет ғарышқа жүк жеткізу құнын едәуір азайтуы мүмкін.

Сарапшылардың айтуынша, егер “Starship” жобасы кедергісіз жүзеге асса, бұл бүкіл ғарыш саласына трансформациялық әсер етуі ықтимал.

“SpaceX” бұл сынақты “Version 2” прототиптерінің соңғысы деп санайды және келесі кезеңде “Starship Version 3” үлгісін ұшыруды жоспарлап отыр.