Түркия Сыртқы істер министрі Хакан Фидан мен Түркия Ұлттық барлау ұйымының басшысы Ибрахим Калын жаңа жылдың алғашқы дипломатиялық кездесуін Анкарада Украина Ұлттық қауіпсіздік және қорғаныс кеңесінің хатшысы Рүстем Умеровпен өткізді.
Түркия Сыртқы істер министрлігі таратқан мәлімдемеге сәйкес, Фидан мен Умеровтың кездесуі бейсенбі күні Анкарада өткен.
Кездесу туралы толық ақпарат жарияланған жоқ, алайда кездесу шамамен төрт жылға созылған Ресей-Украина соғысын аяқтауға көмектесуі мүмкін деген халықаралық деңгейде күшейіп келе жатқан оң ахуал аясында өтті.
Мәскеу және Киевпен байланысын жалғастырып отырған Түркия қақтығыс басталғаннан бері өзін маңызды араағайын ретінде танытып, атысты тоқтату әрекеттерін, тұтқын алмасуды және соғысты тоқтатуға бағытталған келіссөздерді қолдап келеді.
Ибрахим Калынмен кездесу
Қауіпсіздік дереккөздерінің мәліметінше, Умеровтың Калынмен кездесуі Украинадағы қауіпсіздік жағдайына, Ресей мен Украина арасындағы жалғасып жатқан қақтығысқа және оның өңірлік әрі жаһандық салдарына арналды.
Кездесу барысында тараптар бейбітшілікке қол жеткізу үшін басылуы мүмкін ықтимал қадамдарды, келіссөз үдерісіндегі соңғы өзгерістерді, сондай-ақ өңірлік ахуалды ескере отырып атқарылуы мүмкін шараларды талқылады.
Сонымен қатар келіссөздерде Ресейдегі украиналық тұтқындарды босату және тараптар арасында жалғасып жатқан, әрі алдағы уақытта жүзеге асуы мүмкін тұтқын алмасу әрекеттері де қарастырылды.
Калын мен Умеров Түркия мен Украина арасындағы жүйелі ынтымақтастықты жалғастыруға келісті.
Хакан Фиданның 2025 жылғы дипломатиялық марафоны
Фидан қарқынды дипломатиялық жылды артта қалдырып, жаңа жылда Умеровпен кездесті.
Сыртқы істер министрлігінің мәліметіне сәйкес, Фидан 2025 жылы 89 елдегі әріптестерімен 241 кездесу өткізіп, Анкараның халықаралық деңгейдегі белсенді сыртқы саясатын айқындады.
Министрлік таратқан видеода Фиданның өткен жылы 50 елге 73 ресми сапар жасағаны, олардың 22-сі президент Режеп Тайып Ердоғанмен бірге жүзеге асқаны атап өтілді.
Сыртқы істер министрі сондай-ақ 22 көпжақты кездесуге төрағалық етіп, 31 халықаралық жиынға қатысқан. Олардың 10-ына президент Ердоған да қатысқан.
Бұған қоса Түркия екіжақты сапарлар мен көпжақты іс-шаралар аясында 96 елдің Сыртқы істер министрлерін қабылдап, өзгеріп жатқан жаһандық жағдайда Анкараның кең ауқымды дипломатиялық байланыстарын көрсетті.
