Түркияның Ұлттық барлау ұйымы ДАИШ террористік ұйымының жоғары лауазымды мүшелерінің бірін қолға түсіріп, Түркияға жеткізді.

Қауіпсіздік көздерінің хабарлауынша, операция ДАИШ-тің Ауғанстандағы тармағы саналатын ДАИШ-К ұйымының медиа құрылымына бағытталған.

Күдікті Ахмет Казанджы ұйым ішінде Әбу Үбәйдә және Әбу Ибраһим деген лақап аттармен белгілі болған.

Қауіпсіздік көздерінің хабарлауынша, Өзгүр Алтын ұсталғаннан кейін Ахмет Казанджы ұйымның Түркиядағы медиа қызметін басқаруды өз мойнына алған.

Тергеу барысында Ахмет Казанджының Түркиядан Ауғанстан–Пәкістан аймағына барып, ДАИШ-К құрамына қосылғаны және ұйым лагерлерінде белсенді қызмет атқарғаны анықталған.

Сондай-ақ Ахмет Казанджының Өзгүр Алтынмен бірге Түркиядан Ауғанстан–Пәкістан аймағына адам тасымалдауды ұйымдастыруға қатысқаны, ал Алтын ұсталғаннан кейін ұйымға жетекші болғаны анықталды.

Барлау мәліметтеріне қарағанда, ол Пәкістандағы ДАИШ содырларына қарсы жасалған әуе соққыларынан аман қалып, кейін ұйым қызметін жалғастыру үшін Түркияға заңсыз жолмен қайта кіруді жоспарлаған.

Ол кейін шекара маңында жүргізілген операция барысында қолға түсті.

Қауіпсіздік көздерінің хабарлауынша, Ахмет Казанджы тергеу кезінде Өзгүр Алтынмен байланысын мойындап, ұйым аясында әскери және идеологиялық дайындықтан өткенін, сондай-ақ ДАИШ атынан медиа және насихат жұмыстарын жүргізгенін айтқан.

Түркияның қауіпсіздік органдары бұл операцияның елге қарсы жоспарланған ықтимал ДАИШ әрекеттерінің жолын кесіп, ұйымға адам тарту үшін пайдаланылған желілерді әшкерелеуге мүмкіндік бергенін мәлімдеді.