Ресей басып алынған Палестинада заңсыз израильдік қоныстанушылар тобы тарапынан дипломаттарына шабуыл жасалғанын растады.
Сыртқы істер министрлігі 30 шілде күні Иерусалим маңындағы Гивъат-Асаф деп аталатын израильдіктер заңсыз қоныстанған аймақ маңында Палестина Ұлттық әкімшілігіне бет алған дипломатиялық нөмірлі қызметтік көлікке шабуыл жасалғанын мәлімдеді. Көлікте Израиль Сыртқы істер министрлігіне аккредиттелген қызметкерлер болған. Шабуыл оларды тасымалдау кезінде жүзеге асқан.
Мәлімдемеде «Көлікке механикалық зақым келген және шабуыл кезінде қоныстанушылар Ресей дипломаттарын қорқытқан», – делінген.
Министрлік оқиға кезінде Израиль әскери қызметкерлерінің шабуылдаушылардың агрессивті әрекеттерін алдын алу үшін ешқандай шара қолданбағанын атап өтті. Бұл шабуылды «алаңдатарлық және мүлде қабылданбайтын жағдай» деп сипаттады.
Мәлімдемеде «Біз бұл оқиғаны 1961 жылы қабылданған Дипломатиялық қатынастар туралы Вена конвенциясының өрескел бұзылуы ретінде бағалаймыз. Бұл конвенция басқа да мәселелермен қатар қабылдаушы мемлекетті шетелдік дипломаттардың мүлкіне қол сұқпау қағидатын сақтауға, құрмет көрсетуге және олардың жеке басына, еркіндігіне немесе қадір-қасиетіне жасалатын кез келген шабуылдың алдын алу үшін барлық қажетті шараларды қабылдауға міндеттейді», – делінген.
Министрлік сондай-ақ Ресейдің Израильдегі елшілігі арқылы Израиль билігіне ресми наразылық нотасы жолданғанын атап өтіп, «Израиль тарапы бұл жағдайдан қорытынды шығарады деп үміттенеміз»,- деді.
Ресей Сыртқы істер министрлігінің ресми өкілі Мария Захарова Ресейдің Израильдегі елшілігінің Израиль билігіне ресми наразылық нотасын жолдағанын мәлімдеді.
