Солтүстік Корея биыл Ресейге қосымша 3,000 сарбаз жіберіп, Киевке қарсы күресте көмектесу үшін зымыран, артиллерия және оқ-дәрілер жеткізуді жалғастыруда,- деп мәлімдеді Оңтүстік Кореяның әскери басшылығы.
«Қаңтар мен ақпан айлары арасында қосымша 3,000 сарбаз жіберілген болуы керек », – деп бейсенбі күні Оңтүстік Кореяның Бас штаб басшылығы хабарлады.
Ресейге бастапқыда жіберілген 11,000 солтүстіккореялық сарбаздың 4,000-ы қаза тапқан немесе жараланған деп есептеледі. Мәлімдемеде «Адам күшінен бөлек, Солтүстік Корея зымыран, артиллериялық жабдық және оқ-дәрілер жеткізуді жалғастыруда», – делінген.
Есепке қарағанда, «Қазірге дейін Солтүстік Корея қысқа қашықтыққа арналған баллистикалық зымырандардың (SRBM) едәуір көлемін, сондай-ақ 170 мм өздігінен жүретін зеңбіректердің және 240 мм көп зарядты зымыран қондырғыларының шамамен 220 данасын жеткізген»
«Бұл көрсеткіш ұрыс алаңындағы жағдайға байланысты артуы мүмкін», – деп айтылды.
Шабуылшы дрондар
Ресей мен Солтүстік Корея дәстүрлі одақтастар ретінде 2022 жылы Мәскеудің Украинаға шабуылынан кейін жақындай түсті. Сеулдің айтуынша, Ким Чен Ын Мәскеуге мыңдаған сарбаз бен қару-жарақ контейнерлерін жіберуде.
Мәскеу де, Пхеньян да ресми түрде сарбаздардың жіберілгенін растаған жоқ, бірақ өткен жылы екі ел ауқымды әскери келісімге қол қойды. Бұл келісім өзара қорғаныс тармағын қамтиды және Ресей Президенті Владимир Путиннің Солтүстік Кореяға сирек сапары кезінде жасалды.
Солтүстік Кореяның мемлекеттік ақпарат агенттігі бейсенбі күні Ким Чен Ынның жасанды интеллект технологиясымен жабдықталған жаңа суицидтік және барлау дрондарын сынақтан өткізгенін хабарлады.
Жаңа стратегиялық барлау дроны «жердегі және теңіздегі әртүрлі стратегиялық нысандар мен жау әскерлерінің әрекеттерін бақылауға және қадағалауға қабілетті», – деп хабарлады Корея Орталық Ақпарат Агенттігі (KCNA).
Суицидтік дрондар да «әртүрлі тактикалық шабуыл миссияларында қолдануға болатын» соққы беру мүмкіндігіне ие» деп айтылды.
Ким «стратегиялық барлау дронының және жасанды интеллект енгізілген суицидтік шабуыл дрондарының жақсартылған өнімділігін» тексерді. Сондай-ақ ол «өндіріс қуатын кеңейту жоспарын» да бекітті.
