Бразилия президенті Луис Инасиу Лула да Силва Уругвайдың аңызға айналған бұрынғы президенті Хосе "Пепе" Мухикамен қоштасуға келген ондаған мың уругвайлыққа қосылды.

Қатерлі ісікке байланысты 89 жасында қайтыс болған Мухиканың денесі екі күн бойы халыққа ашық тұрды.  Шамамен 100 000 адам қарапайымдылығымен танымал бұл бұрынғы көшбасшыға тағзым етті.

Сезімдеріне ерік берген ел азаматтары 1973-1985 жылдардағы диктатура кезінде түрмеге жабылған, бірақ кейін солшылдардың сайлау арқылы билікке келуіне көмектескен бұрынғы солшыл басшының табытының жанынан өту үшін кезекке тұрды.

Кейбір қара жамылғандар гүл ұстаса, кейбірі иықтарына оның партиясының туын жамылды.

Мухика Монтевидео маңындағы ауылдағы фермасында, өзі сияқты бұрынғы қарулы күрескер, 80 жастағы жары Люсия Тополанскийдің жанында дүниеге көз жұмды.

Оған бір жыл бұрын өңеш қатерлі ісігі диагнозы қойылып, ауру кейін бауырына тараған болатын.

2000 жылдардың басында Латын Америкасы саясатында "қызғылт толқын" тудырған солшыл жетекшілер буынының өкілі  Лула Мухиканы "дүниені өзгертуге тырысқан ерекше адам" деп мадақтады.

Мухиканың саяси мұрагері, Уругвай президенті Яманду Орси мен Чилидің солшыл президенті Габриэль Борич те жерлеу рәсіміне қатысты. Рәсім «Дон Хосеге» атты азаттық маршымен аяқталды.

Қоштасу рәсімінен кейін халық Мухиканың денесінің сарайдан кремацияға дейінгі сапарын тамашалау үшін көшеге ағылды.

Оның күлі фермасында сақталады.

‘Азбен бақытты болу’

2010–2015 жылдар аралығындағы президенттік кезінде жалақысының көп бөлігін қайырымдылыққа жұмсап, «Volkswagen Beetle» көлігімен жүріп, әйелі және үш аяқты итімен қарапайым өмір сүруін жалғастырған "әлемдегі ең кедей президент" атанған бұл ашық сөзді белсенді және фермер көптеген адамға шабыт берді.

"Ол бізге көп нәрсе үйретті — азбен бақытты болуды, сырт көрініс үшін өмір сүрмеуді үйретті," — дейді оны еске алушылар.