Халықаралық көші-қон ұйымы қауіпсіздік деңгейінің артуына байланысты соңғы үш күнде Суданның Оңтүстік Кордофан және Солтүстік Кордофан уәлаяттарынан 4 000-нан астам бейбіт тұрғынның қашқанын хабарлады.
Сейсенбі күні жарияланған мәлімдемеде Біріккен Ұлттар Ұйымының агенттігі 27-29 желтоқсан аралығында Оңтүстік Кордофандағы Әл-Кувейк елді мекенінен 1 500-2 500 адам, сол уәлаяттағы Кадугли қаласынан 375 және Диллинг қаласынан 495 адамның қоныс аударуға мәжбүр болғанын мәлімдеді.
Халықаралық көші-қон ұйымының дерегінше, қоныс аударғандар Солтүстік Кордофан, Оңтүстік Кордофан және Ақ Ніл уәлаяттарының әртүрлі аймақтарына бет алған. Ұйым сондай-ақ Солтүстік Кордофанда қауіпсіздік жағдайының нашарлауына байланысты Жебрат әл-Шейхке қарасты Ум Тагират және Әл-Марха ауылдарынан 1 020 адамның Омдурман қаласына қашқанын атап өтті.
Жексенбі күні Халықаралық көші-қон ұйымы осы себептермен екі уәлаяттан 1 290 адамның қоныс аударғанын хабарлаған болатын.
Солтүстік, Батыс және Оңтүстік Кордофан уәлаяттары бірнеше аптадан бері Судан армиясы мен Жедел қолдау күштері арасындағы қақтығыс алаңына айналып, бұл жағдай он мыңдаған адамның үйлерін тастап кетуіне себеп болды.
Суданның 18 уәлаятының ішінде ЖҚК елдің батысындағы Дарфур аймағындағы бес уәлаяттың барлығын бақылауда ұстап отыр, ал Солтүстік Дарфурдың тек кейбір солтүстік бөліктері ғана әлі де армия бақылауында. Ал армия Хартумды қоса алғанда, елдің оңтүстігі, солтүстігі, шығысы және орталығындағы қалған 13 уәлаяттың басым бөлігін бақылауға алды.
2023 жылдың сәуірінде Судан армиясы мен ЖҚК арасында басталған қақтығыс мыңдаған адамның қаза табуына және миллиондаған адамның босқынға айналуына себеп болды.
