Түркияның Энергетика және табиғи ресурстар министрлігі экологиялық бағыттағы жобалар аясында соңғы жеті жылда жүзеге асырған инвестицияларының арқасында 7,62 миллиард лира көлемінде үнемдеуге қол жеткізді.
Министрліктің мәліметінше, «2053 жылға қарай таза нөлдік шығарынды» мақсатына сәйкес стратегиялар әзірленіп, қоршаған ортаны қорғауға бағытталған бастамалар жүзеге асырылуда.
Осы аяда министрлік 2019–2025 жылдар аралығында экологиялық жобаларға жалпы көлемі 4,41 миллиард лира инвестиция салды. Соның нәтижесінде 7,62 миллиард лира көлемінде үнем қамтамасыз етілді.
Жаңартылатын энергия есебінен 91 миллион тонна көмірқышқыл газының шығарылуына жол берілмеді
Министрлік жаңартылатын энергия көздеріне салынған инвестициялардың қоршаған ортаны қорғауға елеулі үлес қосқанын атап өтті.
Өткен жылы өндірілген 156 мың 999 гигаватт-сағат жаңартылатын энергияның арқасында шамамен 91 миллион тонна көмірқышқыл газының атмосфераға шығарылуының алдын алу мүмкін болды.
Бұл көрсеткіш бір жыл ішінде шамамен 8,27 миллиард ағаш сіңіре алатын көмірқышқыл газы көлеміне тең деп есептеледі.
2025 жылы 531 мыңнан астам көшет отырғызылды
Министрлік тек 2025 жылдың өзінде жалпы ауданы 371,29 гектар жерге 531 мың 869 көшет отырғызды. Соның нәтижесінде шамамен 5 мың 851 тонна көмірқышқыл газының шығарылуына тең көлемдегі эмиссия қысқартылды.
2019–2025 жылдар аралығында жалпы 4 мың 532 гектар аумаққа 4,9 миллион көшет егілді. Осылайша жеті жыл ішінде жалпы көлемі 54 мың 409 тонна көмірқышқыл газының атмосфераға таралуын алдын алу мүмкін болды.
Қалдықтарды қайта өңдеу және суды қайта пайдалану
«Нөлдік қалдықтарды басқару» жобасы аясында 2025 жылы 7 мың 174 тонна қалдық қайта өңделіп, соның арқасында 8 мың 960 ағаштың кесілуіне жол берілмеді.
Министрліктің экологиялық бағдарламалары шеңберінде 2025 жылы 10,2 миллион текше метр су тазартылды. Оның 83 пайызы қайта пайдалануға жіберілді.
Байрактар: “Болашақ ұрпаққа жасыл әрі таза әлем қалдыру үшін жұмыс істеп жатырмыз”
Энергетика және табиғи ресурстар министрі Алпарслан Байрактар әлеуметтік желідегі парақшасында жариялаған мәлімдемесінде:
«Болашақ ұрпаққа өмір сүруге қолайлырақ, жасыл әрі таза әлем қалдыру үшін еңбек етіп жатырмыз. Еліміздің жасыл трансформациясына серпін беретін қадамдарды батыл жүзеге асырып, табиғатпен үйлесімді және өз ресурстарына сүйеніп дамитын Түркияны құруға күш салудамыз.
Біз нөлдік қалдықтар мен энергия тиімділігін біртұтас көзқарастың екі негізгі құрамдас бөлігі ретінде қарастырамыз. Табиғаттың бізге аманат еткен баға жетпес байлығын сақтау үшін ысыраптың алдын алып, табиғи ресурстарымызды барынша тиімді пайдалануға ұмтыламыз.
Жасыл әрі таза болашаққа жетеміз деген сеніммен Дүниежүзілік қоршаған ортаны қорғау күні мен Түркияның Қоршаған орта аптасын құттықтаймын», - деді.
