Билік пен жергілікті БАҚ хабарлағауынша, Үндістанның солтүстік-шығыс аймағында соңғы төрт күн бойы жауған нөсер жауыннан болған көшкін салдарынан кемінде 34 адам қаза тапты. Ауа райы қызметі алдағы күндері тағы да қатты жауын күтілетінін ескертті.
Гималай аймағындағы Сикким штатында қалған мыңнан астам туристтің эвакуацияланғаны, ал Мегхалая штатында су басқан аймақтарда қалып қойған 500-ден астам адамды құтқару үшін әскери құтқару топтары жұмылдырылғаны айтылды.
Көрші Бангладеште Силхеттің солтүстік-шығыс аймағындағы көшкін салдарынан бір отбасының кемінде төрт мүшесі қаза тапты. Жексенбі күні Рангамати, Бандарбан және Кхаграчхари секілді тау аймақтарында жүздеген уақытша баспана ашылғаны хабарланды.
Билік өкілдері тағы да көшкіндер мен кенеттен болатын сел қаупі бар екенін айтып, қауіп аймағындағы тұрғындарды барынша сақ болуға шақырды.
Су тасқыны миллиондаған адамға әсер етуде
Үндістанның солтүстік-шығысы мен Бангладеште жыл сайын миллиондаған адам көшкіндер мен кенеттен болатын су тасқынына байланысты қаза табады. “ANI” ақпарат агенттігі жариялаған кадрларда Ассам штатының Силчар қаласында жолдар мен үйлер су астында қалғаны, ал көшелерде құлаған ағаштар үйіліп жатқаны көрсетілген.
Силчар тұрғыны Сону Деви агенттікке берген сұхбатында: «Біз көп қиындыққа тап болып отырмыз. Бір балам бар. Оның төсегі суға батты. Мұндай жағдайда не істей аламыз? Түнде көз ілмей отырдық.» - деді.
