«Конго Демократиялық Республикасының оңтүстік-шығысында орналасқан жартылай индустриялық мыс кенішінде сенбі күні көпір құлап, шамамен 30 адам қаза тапты»,- деп хабарлайды билік өкілдері. Бұл оқиға биыл елдің шағын көлемді кен өндіру секторындағы ең көп адам қаза тапқан оқиғалардың бірі болып отыр.

Конгоның шағын кен өндіру агенттігі «SAEMAPE»  «Reuters»-ке Луалаба уәлаятында Каландо кен орнында болған апаттан 49 адамның қаза тауып, 20 адамның ауыр жарақат алғанын мәлімдеді. Алайда уәлаят өкілдері кейінірек 32 адамның қаза тапқаны расталғанын жариялап, оқиғадан кейінгі қауіпті және қиын жағдайда нақты санды анықтаудың өте қиын екенін атап өтті.

Атыс дыбыстары салдарынан пайда болған үрей

«SAEMAPE» мәліметі бойынша, оқиға қауіпсіздікке жауапты әскери қызметкерлер оқ атқаннан кейін алаңдағы дүрбелеңнің нәтижесінде болған. Кеншілер көпірге қарай жүгіргендіктен көпір опырылып, адамдар абыр-сабыр жағдайда жарақат алып, қаза тапқан.

Адам құқықтарын қорғау ұйымы әскери қызметкерлердің әрекеттеріне қатысты тәуелсіз тергеу жүргізуді талап етіп, кеншілер мен әскерлер арасында қақтығыс болғаны жөніндегі хабарламаларға назар аударды. Әскерилер тарапынан әзірге ешқандай түсініктеме берілген жоқ.

Бақылаусыз кен орындарындағы өлімге әкелетін жағдайлар

Конгода кен өндіру апаты жиі болады. Елде шамамен 1,5–2 миллион адам негізінен қадағаланбайтын және механикаландырылмаған кен орындарында мыс, кобальт және басқа да минералдарды жаһандық нарыққа жеткізумен айналысады. Қол құралдарымен жұмыс істейтін кеншілер жер астына тереңдеген сайын қауіпсіздік шараларының жеткіліксіздігіне байланысты өлімге әкелетін жер опырылуы жиі болады.

Билік өкілдері құтқару жұмыстары жалғасып жатқан кезде жарақат алғандардың ауруханаға жеткізілгенін мәлімдеді.