Жексенбі күні Каракаста АҚШ күштері тарапынан ұсталып, Нью-Йорктағы түрмеге жеткізілген Мадуро мен оның жұбайын босатуды талап еткен шамамен 2 мың адам шеру өткізді. Олар қызметінен шеттетілген Венесуэла басшысын қолдайтынын білдірді.
Шеру барысында Венесуэланың қызыл, көк және сары түстегі туы желбіреп, Мадуро жақтастары саналатын парамилитарлық топ өкілдері мен мотоциклшілер де шерушілерге ілесіп жүрді.
Қызыл жейде киген бір ер адам Мадуроның рухани ұстазы, марқұм социалист көшбасшы Уго Чавестің суретін ұстап, үстінде «Президентімізді босатыңдар!» деп жазылған плакат алып жүрді.
Сондай-ақ шерушілер Дональд Трамптың Вашингтонның өтпелі кезеңде Венесуэланы басқаратыны туралы сенбі күнгі мәлімдемесіне жауап ретінде «Венесуэла ешкімнің отары емес» деген жазуы бар тағы бір плакат алып шықты.
Мадуро дүйсенбі күні АҚШ-қа кокаин тасымалдаумен байланысты «наркотерроризм» айыптары бойынша Нью-Йоркте сот алдына шығуы тиіс.
Ал Венесуэладағы ауруханалар таңертең жасалған АҚШ шабуылдарынан қаза тапқандар мен жараланғандардың нақты санын әзірге жариялаған жоқ.
«Әуе қорғанысы іске аспады ма?»
Венесуэланың Қорғаныс министрі Владимир Падрино Лопес Николас Мадуроның қауіпсіздік қызметінің елеулі бөлігі, сондай-ақ әскери қызметкерлер мен бейбіт тұрғындар аяусыз өлтірілгенін мәлімдеді. Алайда ол қаза тапқандардың нақты санын атаған жоқ.
Дәрігерлерден құралған бір топ «AFP» агенттігіне берген мәліметінде шамамен 70 адамның қаза тапқанын, 90 адамның жараланғанын айтты.
Каракастағы шеруге шыққан жұрт Мадуроның айналасындағы адамның сатқындығы салдарынан АҚШ арнайы күштерінің оны елдегі ең ірі әскери базада қолға түсіруіне жол ашылғаны жөнінде жорамалдар айтты.
69 жастағы бухгалтер Папа Хуанчо: «Әуе қорғанысының істемей қалуы мүмкін емес. Николас Мадуро сатқындардың кесірінен биліктен шеттетілді, қолында қауіпсіздік шаралары бола тұра, бұлай болмауы керек еді», - деді.
Мадуроның ұлы Николас Мадуро Гуэрра да жексенбі күні әлеуметтік желіде жарияланған аудиоүндеуінде әкесінің айналасында тыңшылар болғанына күдіктенетінін айтты.
Гуэрра: «Сатқындардың кім екенін тарихтың өзі көрсетеді», - деді.
