Ресей үкіметінің қызметкері Париждегі Шарль де Голль әуежайында бірнеше сағат бойы қамауға алынған. Ресей Франциядан бұл жағдайға түсініктеме күтетінін мәлімдеді. Мәскеу бұл оқиғаны «ұятты жағдай» деп сипаттап, айыптады.
Ресей Сыртқы істер министрлігі аты аталмаған қызметкердің министрлікте жұмыс істейтінін және жексенбі күні ресми делегация құрамында Францияға барғанын хабарлады. Ресей тарапының мәлімдеуінше француз шекара полициясы ер адамның француз визасының жарамдылығына қарамастан телефоны мен компьютерін тәркілеп, бірнеше сағат бойы шекара бақылауында ұстаған.
Соңғы айларда Мәскеудің Франция президенті Эммануэль Макронды Еуропаға әсіресе Украинаға қолдау көрсеткені үшін сынға алуы Франция-Ресей қарым-қатынастарында жаңа дағдарысқа себеп болды.
«6 сәуірде Шарль де Голль әуежайында болған жағдай қабылданбайды», – деді Ресей Сыртқы істер министрлігінің өкілі Мария Захарова сәрсенбі күнгі баспасөз мәслихатында.
Сонымен қатар Захарова Ресей елшілігінің дереу консулдық қызметкерді әуежайға жібергенін және дипломаттың ресми делегациядағы әріптестеріне жету үшін шамамен жеті сағат күтуге мәжбүр болғанын мәлімдеді. «Біз бұл жағдайды жауапсыз қалдырмаймыз», – деді Захарова. Ол Парижден бұл жағдайға қатысты дереу жауап болмағанын да атап өтті.
Кремльден қатаң айыптау
Кремль бұл оқиғаға қатысты қатал мәлімдеме жасап, «қамауға алу мүлдем қабылданбайды» деді. Бұл Мәскеу мен Париж арасындағы қарым-қатынасты бұдан әрі нашарлататынын айтты. Ресей Франция Сыртқы істер министрлігіне наразылық нотасын жолдап, Францияның Ресейдегі елшісін келіссөзге шақырған.
Ресей мен Франция Ресей-Украина соғысы басталғалы бері көптеген дипломатты елден шығарды. Соңғы уақытта Кремль Украинадағы қақтығысқа байланысты ашуын Еуропаға бағыттап, Америка Құрама Штаттарымен неғұрлым қалыпты қарым-қатынас орнатуға тырысуда.
Украинаның мықты жақтаушысы Франция болашақ бітімгершілік келісімінің бір бөлігі ретінде елге бітімгершілік күшін енгізу идеясын алға тартты. Алайда Ресей бұл ұсынысты соғыс жариялаумен тең деп санайды.
Макрон дүйсенбі күні Ресейді АҚШ пен Украинаның атысты тоқтату туралы бірлескен ұсынысын қабылдамай, Қаратеңізде атысты тоқтату шарттарын алға қойғаннан кейін «кейінге қалдыру тактикасын» қолданды деп айыптады. Ал Мәскеу болса Швейцарияда орналасқан қақтығыстарды реттеу жөніндегі үкіметтік емес ұйымда жұмыс істейтін француз зерттеушісі Лоран Винатьені түрмеде ұстап отыр.
