Түркия Қорғаныс министрлігі бейсенбі күні Ресей мен Украина арасында атысты тоқтату келісімі қамтамасыз етілмейінше, Түркияның халықаралық қауіпсіздік күшіне үлес қосуына қатысты ешқандай келіссөз жүргізілмейтінін мәлімдеді.
Министрлік «көпұлтты бейбітшілік миссиясы аясында түрік әскерлері Украинаға жіберілуі мүмкін» деген мәліметтерге қатысты түсініктеме берді.
Мәлімдемеде «Кез келген жерде бейбітшілікке, қауіпсіздік пен тұрақтылыққа қажеттілік туса, ең алдымен Түрік Қарулы Күштерінің ойға оралуы – олардың мүмкіндіктері, қабілеттері, тиімділігі, тосқауыл болуы және беделінің ең маңызды көрсеткіші», - делінді.
Министрлік: «Алдымен Ресей мен Украина арасында атысты тоқтату қажет. Одан кейін міндет нақты анықталып, миссияның шеңбері мен қай елдің қандай көлемде үлес қосатыны айқындалуы тиіс. Түрік Қарулы Күштері өңірімізде қауіпсіздік пен тұрақтылықты қамтамасыз етуге бағытталған кез келген бастамаға үлес қосуға дайын», - деп толықтырды.
Бұдан бұрын Франция президенті Эммануэль Макрон болашақта құрылуы мүмкін қауіпсіздік күшіне француз, британ және түрік сарбаздары кіруі ықтимал екенін мәлімдеген болатын.
Соғыс басталғалы бері Мәскеу және Киевпен теңгерімді байланыс орнатқан Анкара әскер орналастыру туралы ұсыныстарды талқылауға ашық екенін, алайда бұл миссияның мақсаттары мен ауқымы нақтыланған жағдайда ғана мұндай міндетті қабылдай алатынын айтқан болатын.
«Еуропаның қатысуы»
Еуропа елдері АҚШ президенті Дональд Трамп ұсынған 28 тармақтан тұратын Украина бейбітшілік жоспарына түрлі алаңдаушылық білдірді. Жоспардың Украинадан аумақтық және әскери жеңілдіктер талап ететіні, сондай-ақ Киевті берілуге итермелейтіні алға тартылды.
Еуропалық одақтастардың қысымы және АҚШ-Украина өкілдері арасындағы Женева келіссөздерінен кейін жоспардың қайта қаралғаны хабарланды.
Үдеріс алға жылжыған сайын Еуропадағы актерлар келіссөздерге тікелей араласа бастады.
Ұлыбритания, Франция және Германия Украинаның егемендігінің сақталуы, ел территориясынан жер беруден бас тартылуы, қорғаныс қабілетінің қамтамасыз етілуі мен болашақ қауіпсіздік тетіктерін айқындауда Еуропаның араласуы міндетті екенін көрсететін қарсы ұсыныс дайындады.
Ал Анкара батыстан осындай бастамалар келген жағдайда да өз ұстанымының өзгермегенін қайталап, әскер орналастыру жөніндегі келіссөздердің атысты тоқтату орнамайынша, өкілеттіктер нақты айқындалмайынша және қатысушы мемлекеттер арасында міндеттер белгіленбейінше алға жылжи алмайтынын мәлімдеді.
Түркия Қорғаныс министрлігі өңірлік бейбітшілік пен тұрақтылықты нығайтуға бағытталған кез келген бастаманы тек осы алғышарттар толық орындалған жағдайда ғана қарастыратынын білдірді.
