Түркия Республикасының вице-президенті Джевдет Йылмаз бейсенбі күні Анкарадағы Президенттік кешенде АҚШ-тың Түркиядағы елшісі, әрі Сирия бойынша арнайы өкілі Том Барракті қабылдады.

Йылмаз түркиялық «NSosyal» әлеуметтік желісіндегі парақшасында жасаған мәлімдемесінде кездесу Түркия мен АҚШ арасындағы қарым-қатынастарды нығайтуға, кейбір салаларда ынтымақтастықты арттыруға және аймақтағы соңғы оқиғаларға қатысты пікір алмасуға бағытталғанын атап өтті.

Мәлімдемеге қарағанда, тараптар экономикалық және сауда байланыстарымен қатар, АҚШ-тың «Санкциялар арқылы Американың қарсыластарына қарсы тұру туралы» заңы (CAATSA) аясында Түркияға қолданған шектеулерін қоса алғанда, қорғаныс өнеркәсібіне қатысты мәселелерді қарастырды. Түркия АҚШ-тың жойғыш ұшақтарын сатуға кедергі келтіретін мұндай санкциялардың одақтастық қатынастарға сай келмейтінін бұған дейін де білдірген болатын.

Йылмаз сондай-ақ кездесуде Иран мен Сириядағы соңғы өзгерістер мен Газа бейбітшілік жоспарының екінші кезеңі аясындағы аймақтық және жаһандық мәселелер бойынша пікір алмасылғанын жеткізді.