АҚШ-та әлеуметтік желілерге қарсы қозғалған көптеген сот ісінің ішінде салдары ең ауыр болуы ықтимал үдерістердің бірі саналатын бұл федералдық іс сәрсенбі күні Сан-Франциско маңындағы Окленд қаласының федералдық сотында алқабилерді іріктеуден басталады.

Тараптардың кіріспе сөздері 18 тамызда басталады деп жоспарлануда. Сот процесі шамамен алты аптаға созылып, үкім қазан айының басында шығуы мүмкін.

Калифорния, Колорадо, Кентукки және Нью-Джерси штаттарының бас прокурорлары әлемдегі ең ірі әлеуметтік желі компанияларының бірі “Instagram” мен “Facebook” платформаларын балаларды әдейі тәуелді етуге бейімдеп жасаған деп айыптайды.

Бұған қоса олар “Instagram” мен “Facebook”-тің кәмелетке толмаған балалар үшін жұмыс істеу тәртібіне қатысты бірқатар қатаң шектеу енгізуді талап етіп отыр. Сондай-ақ “Meta”-дан 1,4 триллион долларға дейін айыппұлдық өтемақы өндіріп алуды сұрайды. Бұл сома компанияның бүкіл нарықтық құнына жуық: жұма күнгі көрсеткіш бойынша “Meta”-ның нарықтық капитализациясы 1,5 триллион доллардан асқан.

“Meta”-ның негізін қалаушы әрі бас директоры Марк Цукерберг – айыптаушы тарап куәгер ретінде шақыруды жоспарлап отырған негізгі тұлғалардың бірі.

Цукерберг осыдан алты ай бұрын Лос-Анджелесте қаралған бөлек сот ісінде де куәлік берген болатын.