Албания астанасы Тирана маңындағы таулы Круя қаласының елді мекендеріне қауіп төндірген орман өрті Түркияның «Bayraktar TB2» дроны қатысқан өрт сөндіру жұмыстарының нәтижесінде бақылауға алынды.

Соңғы күндері Албанияның бірнеше өңірінде орман өрті шықты. Соның ішінде Тиранаға жақын орналасқан Круя қаласы мен оның маңында ірі өрт тіркелді.

Круяда түні бойы жалғасқан өрт сөндіру жұмыстарына Қарулы күштер, азаматтық төтенше жағдай қызметтері мен өрт сөндіру бөлімдерінен шамамен 300 адам қатысты.

Билік өкілдері жексенбі күні де әуеден қолдау көрсету арқылы өртпен күрес жұмыстары жалғасқанын хабарлады.

Операцияға Ұлттық азаматтық қорғау агенттігінің 21 өрт сөндіру көлігі, үш тікұшақ, бір «Bayraktar TB2» дроны және жылу камераларымен жабдықталған екі дрон жұмылдырылды.

Өрттен зардап шеккен елді мекендердің кейбір тұрғындары қауіпсіз жерге көшірілді.

Өрт бақылауға алынғаннан кейін Албания премьер-министрі Эди Рама «X» әлеуметтік желісінде қоймалардың бірінің өртенгенін, алайда тұрғындар арасында зардап шеккендер болмағанын мәлімдеді.

«Круя тауындағы ауқымды өртпен күрес кезінде қатты желге байланысты түні бойы әуеден өрт сөндіру құралдары қолданылды. Өрт сөндірушілеріміз, әскери және полиция бөлімшелері ерлік пен жоғары кәсібилік танытып, осы аптап ыстықта Еуропаның өзге елдерінде болғандай қайғылы жағдайдың алдын алды», – деді ол.

Ішкі істер министрі Бесфорт Ламаллари өрт сөндіру жұмыстарын оқиға орнында бақылап отырды.

Ламаллари өрттің табиғи себептерден емес, адам әрекетінен шыққанын айтып, полицияның күдіктіні ұстағанын мәлімдеді.

Албанияның Геология ғылымдары институтының мәліметінше, жексенбі күні елдің кейбір қалаларында орман өртінің шығу қаупі әлі де жоғары деңгейде.

2025 жылы «Baykar Technologies» компаниясы әзірлеген Түркияның алғашқы отандық дроны «Bayraktar TB2» авиация тарихында басқарудан шығып, айнала құлдилау жағдайынан өздігінен қалыпты ұшу режиміне оралған алғашқы дрон болды.

Бұған дейін мұндай маневрді басқа бірде-бір қарулы дрон сәтті орындай алмаған еді.