Бұл тақырыпқа байланысты ақпарат Газа Денсаулық сақтау министрлігі мен БҰҰ 10 қазанда күшіне енген атысты тоқтатуға қарамастан шабуылдардың жалғасып жатқанын, 340-тан астам палестиналықтың қаза тауып, шамамен 900 адамның жараланғаны туралы ескертуінен кейін тарады.
Израиль әскері атысты тоқтату келісімін бұзуды күшейтіп, Газа секторындағы үйлерді қиратуды және артиллериялық шабуылдарды жалғастырды.
Анадолы агенттігіне сұқбат берген куәгерлердің айтуынша, әскер Газа қаласының солтүстігіндегі әскер бақылауындағы «сары аймақ» ішінде орналасқан Шуджайя ауданындағы бірнеше үйді жарып жіберген.
Оңтүстіктегі куәгерлер болса, Израиль артиллериясының «сары сызықтан» тыс жатқан Хан-Юнустың шығыс бөліктеріне де соққы бергенін айтты. Материалдық залал туралы ақпарат жарияланбады.
Газа Азаматтық қорғанысының мәліметінше, дүйсенбі кешкісін Газа қаласының әл-Наср ауданындағы бір үйдің ішінде Израильге тиесілі оқ-дәрі жарылып, екі палестиналық қаза тапқан, бірнеше адам жараланған.
Палестинаның БҰҰ-дағы өкілі Рияд Мансур дүйсенбі күні Қауіпсіздік Кеңесіне жасаған мәлімдемесінде 10 қазандағы атысты тоқтату келісімнен бері Израиль әскері Газа секторында күніне екі палестиналық баланы өлтіріп отырғанын, ал жараланғандар мен қаза тапқандар саны 1 000-ға жеткенін айтты.
Газа Денсаулық сақтау министрлігінің дерегінше, келісім күшіне енгеннен бері Израиль шабуылдары салдарынан кемінде 342 палестиналық қаза тауып, шамамен 900 адам жараланған.
2023 жылдың қазан айынан бері Израиль әскері Газада шамамен 70 000 адамды өлтірген. Олардың көпшілігі әйелдер мен балалар. Израиль екі жылға созылған соғыста 170 900-ден астам адамды жаралаған. Бұл соғыс аймақтың басым бөлігін үйіндіге айналдырды.
