Заңсыз израильдік қоныстанушылар сәрсенбі күні Хевронның оңтүстігіндегі Масафер-Ятта аймағында орналасқан Хирбет әл-Туба елді мекеніне шабуыл жасап, палестиналықтарға тиесілі бірнеше үйді өртеді. Салдарынан алты адам жараланды. Сонымен қатар Израиль күштері басып алынған Батыс Шерияға рейдтерін арттырды.
Палестина Қызыл Жарты Ай қоғамы шабуыл кезінде жараланған үш әйелмен бірге алты адамға медициналық көмек көрсетіліп, олардың ауруханаға жеткізілгенін хабарлады.
Палестинаның «WAFA» ақпарат агенттігінің мәліметінше, қаруланған заңсыз қоныстанушылар бірнеше үйді өртеген. Салдарынан әйелдер мен балалар түтінге уланған.
Жергілікті дереккөздер Израиль күштерінің Бейт-Лахмның оңтүстігіндегі Бейт-Фаджарға, сондай-ақ Рамалланың шығысындағы Кафр-Малик пен Дейр-Джарирге және басқа да елді мекендерге рейд жүргізгенін хабарлады.
Әл-Бира қаласында әскерлер үш үйдің тұрғындарын күшпен шығарып, баспаналарды әскери бекетке айналдырды. Олар жақын маңдағы Умм аш-Шарайит ауданына да орналасып, негізгі жолдарды жауып, палестиналықтардың жүріп-тұруын шектеді.
Ал әл-Мугайир ауылының батысындағы Шааб әл-Лоуз аймағына малдарымен кірген израильдік қоныстанушылар палестиналықтардың жерлері мен мүлкіне шабуылдады.
Ал Израиль күштері басып алынған Шығыс Иерусалимнің солтүстігіндегі Кафр-Акаб елді мекені мен Каландия босқын лагерінде ауқымды операция жүргізді. Каландия медиа орталығы әскерилердің ондаған үйге басып кіріп, бір әйелмен бірге 15-ке жуық палестиналықты қамауға алғанын хабарлады.
Палестина Қызыл Жарты Ай қоғамы мәлімдемесінде рейд кезінде Израиль әскерлері соққыға жыққан сегіз палестиналыққа көмек көрсеткенін жеткізді. Әскерлер медицина қызметкерлерінің жаралылар мен науқастарға жетуіне кедергі келтіруге тырысқанымен, лагерьден бес науқас қауіпсіз жерге шығарылған.
