Рим папасы Лео XIV аймақтағы адам шығыны көбейіп жатқан кезде АҚШ президенті Дональд Трампқа кеңейіп бара жатқан Иран қақтығысынан дипломатиялық шығу жолын іздеу туралы үндеу тастады.

Сейсенбі күні Рим маңындағы Кастель-Гандольфодағы резиденциясының сыртында журналистерге үн қатқан Папа «Маған жеткен мәлімет бойынша, президент Трамп жақында соғысты аяқтағысы келетінін айтыпты. Ол шығу жолын іздейді деп үміттенемін. ... Зорлық-зомбылықты азайтудың жолын табады деп сенемін», — деді.

Бұл мәлімдемелер — 28 ақпанда Иранға жасалған АҚШ пен Израильдің бірлескен әуе шабуылдарынан кейін басталған, содан бері Таяу Шығысқа жайылып, мыңдаған адамның өліміне әкелген және жаһандық энергия нарығын шайқалтқан қақтығысқа қатысты Леоның әдеттен тыс тікелей сөзі.

Папа сондай-ақ бейбіт тұрғындар арасындағы шығынның артуына алаңдаушылық білдіріп, Пасха мерекесі тойланатын 5 сәуірге дейін қақтығыстарды дереу тоқтатуды сұрады. «Күнәсіз балаларды қосқанда, өте көп адам қаза тапты. Түбегейлі бейбітшілікке шақырайық. (...) Төбелесті, зорлық-зомбылық пен соғысты қолдайтын адамдар тым көп», — деп атап өтті.

Папа жексенбі күні соғыс бастаған және «қолдары қанға боялған» көшбасшылардың дұғаларын Құдайдың қабыл алмайтынын айтқан болатын.