АҚШ пен Ресей келіссөздерінің екінші кезеңі Стамбулда басталды.
АҚШ делегациясы бейсенбі күні сағат 09:45-те Стамбулдағы Ресей Бас консулдығына келіп, екі елдің елшіліктерінің жұмысын қалыпқа келтіруге бағытталған келіссөздерге қатысты.
АҚШ Мемлекеттік департаментінің баспасөз хатшысы Тэмми Брюс сейсенбі күні Стамбулдағы келіссөздерде екі елдің «екі жақты миссияларының жұмысын одан әрі тұрақтандыруға» бағытталған талпыныстары талқыланатынын айтты.
Сонымен қатар Брюс «күн тәртібінде саяси немесе қауіпсіздік мәселесі және Украина мәселесі күн тәртібінде мүлдем жоқ» деп атап өтті.
Кездесулер Ресейдің Стамбулдағы Бас консулдығының резиденциясында өтуде. Кездесу бірнеше сағатқа созылады, бірақ алдыңғы тур сияқты алты сағаттан аспайды деп күтілуде.
Ресей делегациясына Ресейдің АҚШ-тағы елшісі Александр Дарчиев, ал АҚШ делегациясына Мемлекеттік хатшының орынбасары Соната Култер төрағалық етеді.
Отырыс алдында мәлімдеме жасаған Дарчиев кейбір мәселелер бойынша ілгерілеушілік бар екенін мәлімдеді.
Мәскеу мен Вашингтон соңғы жылдары дипломаттар үшін аккредитация алудағы қиындықтарға шағымданып, елшіліктерінің жұмысы айтарлықтай бұзылғанын айтты.
Ресей тарапы Батыстың санкцияларына байланысты дипломаттарға тіпті жалақы төлеуде де қиналып жатқанын мәлімдеcе, АҚШ дипломаттары Ресейде әрекет ету аймағының шектелгенін айтады. Екі жақ та бір-бірін айыптауда.
Келіссөздердегі басты мәселелердің бірі – дипломатиялық мүлік. АҚШ Ресейге тиесілі алты жылжымайтын мүлікке, соның ішінде Лонг-Айлендтегі «Killenworth» сарайына, Мэриленд штатындағы «Pioneer Point» саяжайына, Сан-Франциско мен Сиэтлдегі консулдықтарға, Вашингтон мен Нью-Йорктегі сауда өкілдіктеріне шектеу қойды.
