Израиль Қорғаныс министрі Исраэль Кац жұма күні Йемендегі хоуситтер жетекшісі Абдул Малик әл-Хусиді өлтіремін деп қоқан-лоққы көрсетті. Сондай-ақ Израиль туын Йемен астанасы Санада желбірететінін айтты.
Кац 28 тамыз күні Санада болған әуе шабуылына сілтеме жасап, онда Хоуситтер үкіметінің премьер-министрі Ахмед Галиб әл-Рахави мен бірнеше министрдің қаза тапқанын атап өтті. «Х» әлеуметтік желісінде жариялаған мәлімдемесінде «Абдул Малик әл-Хуси кезегің келді. Сені үкіметіңмен бірге тозақтың түбінде күтіп тұрған қорқақ, зұлым одақ мүшелеріне қосамыз. Хоуситтердің туы Израильдің туымен ауыстырылады», – деді.
28 тамыз күні Израильдің Санаға жасаған әуе соққысында Хоуситтер үкіметінің премьер-министрі Рахавимен бірге бірнеше министр, жалпы саны 12 жоғары лауазымды тұлға қаза тапқан.
Хоуситтер Израильге тиесілі кемелерге зымыран және ұшқышсыз әуе аппараттарымен шабуыл жасап келеді. Топ бұл әрекеттерін Израильдің 2023 жылдың 7 қазанынан бері Газаға жүргізіп жатқан геноцидіне қарымта деп түсіндіреді.
Израиль шабуылдары салдарынан 65 100-ден астам палестиналық қаза тапқан. Олардың көпшілігі әйелдер мен балалар. Сондай-ақ жүз мыңдаған адам үйсіз қалған. 435 палестиналық ашаршылықтан көз жұмды. Олардың кемінде147-сі бала.
