«BFMTV» телеарнасының хабарлауынша, жексенбі күні түнде Францияда соңғы жеті жылдағы ең ыстық түн болды. Алдағы күндері аптап ыстық күшеюі мүмкін.
«BFMTV» телеарнасының мәліметінше, түнгі температура 2019 жылдың шілде айындағы аптап ыстықтан бергі ең жоғары деңгейге жетіп, ел бойынша орташа температура шамамен 21,4 градус Цельсийді құрады.
«Météo-France» Париждегі түнгі ең төменгі температура 24,2 градус болғанын хабарлады. Бұл көрсеткіш соңғы он жылдағы рекордты жаңартты.
Синоптиктер аптап ыстықтың сақталатынын, тіпті апта ішінде күшейе түсетінін болжап отыр.
Францияның көптеген аймағында аптап ыстыққа байланысты қызыл және қызғылт сары деңгейдегі ескерту жарияланды. Кей жерлерде ауа температурасы 40 градус Цельсийге дейін жетуі мүмкін.
«Météo-France» дүйсенбі күні ескерту деңгейін күшейтіп, 49 өңірді қызыл, ал 40 өңірді қызғылт сары қауіп аймағына енгізді.
Францияның Ұлттық білім министрі Эдуар Жеффре демалыс күндері 845 мектепте дүйсенбі күні сабақ тоқтатылатынын, ал 1800 мектепте оқу кестесі өзгертілетінін мәлімдеді.
Францияның Ұлттық азаматтық қауіпсіздік қызметінің өкілі Жером Буланже «ICI Paris» радиосына берген сұхбатында сенбіден бері суға түскен 13 адамның суға батып көз жұмғанын айтты.
Буланже: «Аптап ыстық кезінде жеткілікті мөлшерде су ішу өте маңызды. Алайда адамдар суға түсетін болса, міндетті түрде бақылаудағы жағажайлар мен арнайы орындарды таңдауы керек», – деді.
