Қытай Халық Республикасының мемлекет басшысы Си Цзиньпин Африканың пайдалы қазбалар ресурстары «Африкаға тиесілі» екенін мәлімдеп, Бейжіңнің бұл секторды қолдайтынын білдірді. Си сонымен қатар салаға зиян тигізуі мүмкін «геосаяси бәсекелестіктерге» қарсы ескерту жасады.
Қытай мемлекеттік және жеке компаниялары арқылы Африканың құнды тау-кен өнеркәсібі секторында шешуші рөл атқарады. Ел - қазіргі уақытта бұл ресурстарға қол жеткізу жолында таласып жатқан ірі державалардың бірі.
Ауқымды тау-кен өнеркәсібі бар Ботсвананың президенті Дума Бокомен Бейжіңде кездескен Си: «Африка ресурстарының Африкаға тиесілі болу қағидаты кез келген ынтымақтастықтың алғышарты болуы тиіс», — деп атап өтті.
«Синьхуа» ресми ақпарат агенттігінің хабарлауынша, Си: «Африка әділетсіз халықаралық еңбек бөлінісі салдарынан өнеркәсіп пен құн тізбегінің ең төменгі сатысына ығыстырылды. Бұл — шұғыл түрде жойылуы тиіс тарихи әділетсіздік», — деді.
Қытай лидері даму жоспарларын әзірлеуде өз елінің көмегін ұсына отырып, «адамгершілік қағидаттары мен экономикалық мүдделер» арасында тепе-теңдік орнатуға шақырды.
Біріккен Ұлттар Ұйымының мәліметтері бойынша, Африка елдері кобальт, мыс, литий, никель және сирек кездесетін жер элементтерін қоса алғанда, әлемдік маңызды пайдалы қазбалар қорының шамамен 30 пайызын иеленіп отыр. Бұл жағдай құрлықты стратегиялық ресурстар үшін АҚШ пен Қытай арасындағы бәсекелестіктің басты ошағына айналдыруда. Еуропа елдері мен басқа да актерлер де ықпал ету үшін күрес жүргізуде.
Өз сөзінде Си: «Африка ресурстары геосаяси бәсекелестіктің құралына айналмауы тиіс», — деп, процеске қатысушы барлық шетелдік күштерді «Африканың дамуын шын жүректен қолдауға» және ынтымақтастық үшін «тұрақты» ортаны сақтауға көмектесуге шақырды.
Қытай — Африканың ең ірі сауда серіктесі, әрі құрлық бойынша инфрақұрылымдық жобаларды қаржыландырудың маңызды көзі.
Өткен жылы жарияланған саясат шеңберінде Бейжің 1 мамырдан бастап дипломатиялық қарым-қатынасы жоқ Эсватиниден басқа барлық Африка елдеріне бағытталған нөлдік кедендік салық режимін кеңейтті.
Кейбір сарапшылар Қытайды қосқанда шетелдік актерлерді тиісті елдер мен олардың халықтарына нақты пайда тигізбей, Африка ресурстарын пайдаланып отыр деп айыптайды.
Өз елінің «Африканың дамуына» адалдығын баса айтқан Си Бейжіңнің Қытай-Африка кен ынтымақтастығын жоғары «өнеркәсіптік қосылған құн» деңгейіне жеткізуді мақсат ететінін жеткізді.
