Венесуэланың уақытша президенті Делси Родригес жексенбі күні мәлімдеме жасап, АҚШ күштері жүргізген рейд нәтижесінде президент Николас Мадуро мен оның жұбайы ұсталып, түрлі айыптармен АҚШ-қа сотқа жеткізілгеннен кейін АҚШ үкіметін Венесуэламен бірлесіп жұмыс істеуге шақырды.
Родригес “Instagram” әлеуметтік желісінде жарияланған мәлімдемесінде: «АҚШ үкіметін халықаралық құқық аясында бізбен ынтымақтасуға шақырамыз», - деді.
Родригес АҚШ президенті Дональд Трампқа үндеу жасап, «Құрметті президент мырза, халықтарымыз бен өңіріміз соғысты емес, бейбітшілік пен диалогты қалайды. Бұл — президент Николас Мадуроның әрдайым айтып келген ұстанымы және қазіргі таңда бүкіл Венесуэланың үндеуі», - деп жазды.
Трамп жексенбі күні таңертең Родригес туралы қойылған сұраққа жауап беріп, оның «бірлесіп жұмыс істеп отырғанын» айтты, алайда олай болмаған жағдайда оның «Мадуродан да ауыр жағдайға тап болуы мүмкін» екенін ескертті.
Родригестен не талап етілетіні сұралғанда Трамп: «Бізге толық қолжетімділік қажет. Елдеріндегі мұнайға және олардың елін қайта құруға мүмкіндік беретін басқа да ресурстарға қол жеткізуіміз керек», - деді.
