Сибига әлеуметтік желідегі парақшасында Украинаның соңғы күндері жаппай әуе шабуылдарына ұшырап жатқанын атап өтті.
«Украина Ресейдің жаңа террорлық шабуылдарына жауап ретінде БҰҰ Қауіпсіздік Кеңесінің шұғыл отырысын өткізуді талап етті», – деді ол.
Министр Ресей әскерінің 7 қазанда Прилуки қаласына, ал кеше Краматорскідегі екі жолаушылар автобусына шабуыл жасағанын хабарлады. Сондай-ақ ел астанасы Киевке де соққылар жасалғанын айтып, соңғы күндері 78 адамның қаза тауып, 215 адамның жараланғанын мәлімдеді.
Сибига Ресей президенті Владимир Путинді соғыс қылмыскері деп атап, оның майдан даласында ешқандай нәтижеге қол жеткізе алмағандықтан, Украинаның бейбіт тұрғындарына қарсы шабуылдарды күшейтіп жатқанын айтты.
Сибига сондай-ақ Ресейдің БҰҰ жанындағы тұрақты өкілдігін заңсыз деп санайтынын мәлімдеді.
«Халықаралық қоғамдастық БҰҰ Жарғысының қағидаттарын ұстанып, Ресейдің әрекеттеріне нақты әрі тиісті жауап берілуін қамтамасыз етуі тиіс», – деді Украина Сыртқы істер министрі.
