Бір жылдық атысты тоқтату келісіміне қарамастан Израиль күштері шабуылдарын күшейтіп жатқан тұста, Қорғаныс министрі Исраэль Кац Израильдің қауіпсіздігі толық қамтамасыз етілмейінше Ливанда «тыныштық» орнамайтынын ескертті. Кац сәрсенбі күні Израиль парламентінде сөйлеген сөзінде: «Солтүстіктегі тұрғындарға бағытталған ешбір шабуылға жол бермейміз. Бар күшімізді қолданамыз, тіпті арттырамыз», - деді. Ол бірнеше күн бұрын Бейруттың оңтүстігіне жасалған Израиль шабуылы кезінде жоғары лауазымды бір Хезболла басшысының өлтірілгеніне тоқталып, «Израиль мемлекетінің қауіпсіздігі қамтамасыз етілгенге дейін Бейрутта тыныштық орнамайды, Ливанда да тәртіп пен тұрақтылық орнамайды», - деп Хезболланы қарусыздандыруға уәде берді.
Жексенбі күні Бейруттың оңтүстік шет аймақтарына жасалған Израиль шабуылы кезінде Хайсам Али Табатабаи қаза тапты. Табатабаи ˗ атысты тоқтату келісімінен кейін Израиль тарапынан өлтірілген ең жоғары лауазымды Хезболла мүшесі.
Оның өлімі АҚШ Ливан үкіметіне Хезболланы қарусыздандыруға қысымды күшейіп, ал Израильдің Ливанға қарсы шабуылдары артқан кезеңмен тұспа-тұс келді.
Израильдің келісімді бұзуы
Мысыр Сыртқы істер министрі Бадр Абдель Ати сәрсенбі күні Бейрутта Ливан президенті Жозеф Аунмен кездесуінен кейін, елдерінің Ливанда күшейіп келе жатқан шиеленісті бәсеңдету бағытында жұмыс істеп жатқанын айтты. «Кез келген шиеленіске алаңдаймыз және Ливанның қауіпсіздігі мен тұрақтылығы үшін қатты уайымдаймыз. Ливанды кез келген қатерден және оның қауіпсіздігіне бағытталған агрессивті ниеттерден қорғау үшін бар күшімізді салып жатырмыз», - деді.
Израиль атысты тоқтату келісіміне қарамастан Ливанды бірнеше рет бомбалады.
Ливан президенті Аун осы апта басында, елінің Израильдің атысты тоқтату режимін бұзуын тоқтататын және өткен жылғы келісімнен бері Израиль басып алған бес шекара аймағынан әскерін шығаруды қамтамасыз ететін келісім бойынша келіссөздер жүргізуге дайын екенін мәлімдеді.
Аун сондай-ақ Израиль әскері шегінген барлық бекіністерде Ливан армиясын орналастыруға дайын екенін атап өтті.
