«Калмаеги» тайфуны жұма күні таңертең Вьетнам аумағына жетіп, тағы бес адамның өмірін қиды. Бұған дейін бұл тайфун Филиппинде 188 адамның өліміне себеп болған еді.

Апта басында тайфун Филиппиннің орталық бөлігінде нөсер жаңбыр мен су тасқынын тудырып, көліктерді, жүк машиналарын және контейнерлерді ағызып әкеткен болатын. Бейсенбі түні дауыл Вьетнам аумағына енді.

Қоршаған орта министрлігінің мәліметінше, тайфун сәтінде жел жылдамдығы сағатына 149 шақырымға дейін жеткен.

Билік өкілдері жұма таңына дейін залалдың көлемін анықтауды жалғастырды. Министрлік дерегінше, Жиа Лай мен көршілес Дак Лак провинцияларында бес адам қаза тауып, 57 үй толығымен қираған. Сондай-ақ шамамен 3 000 үйдің шатыры ұшқан немесе зақымданған, ал 11 кеме мен қайық суға батқан.

Ғалымдардың айтуынша, адамзат әрекетінен туындаған климаттың өзгеруі мұндай дауылдардың қуатын арттыруда. Теңіз суларының жылынуы тайфундардың тез күшеюіне ықпал етсе, жылы атмосфера ылғалды көбірек ұстап, жауын-шашынды ұлғайтады.