Ұлыбритания үкіметі елде босқын мәртебесін алған адамдар жұмысқа орналасқаннан кейін мемлекет көрсеткен баспана мен әлеуметтік қолдау шығындарын өтеу үшін шамамен 10 мың фунт стерлинг қайтаруын көздейтін жоспарды жариялады.
Сейсенбі күні парламентке ұсынылған жаңа Көші-қон және баспана туралы заң жобасы аясындағы бұл өзгеріс жеткілікті табыс табатын ересектерді аталған соманы бөліп төлеуге міндеттейді.
Бұл талап Ұлыбританияда жұмыс істеуге рұқсаты бар босқындарға қатысты қолданылады. Сондай-ақ олар елде тұрақты тұру құқығын алғанға дейін бұл соманы толық өтеуі тиіс.
Ішкі істер министрі Шабана Махмуд баспана беру тек құқық қана емес, сонымен бірге жауапкершілік жүктейтінін айтты. Оның сөзінше, адамдар қаржылай үлес қоса алатын жағдайға жеткен кезде британ қоғамының көрсеткен қолдауын өтеуі керек.
Заң жобасына сәйкес, баспана сұрауы қабылданбағанымен елде қалып қойған адамдар да табысы белгіленген шектен асқан жағдайда осы шығындарды өтеуге міндеттеледі.
Ұлыбритания Ішкі істер министрлігінің мәліметінше, өткен жылы босқындарды қолдауға шамамен 4 миллиард фунт стерлинг жұмсалған.
“Refugee Council” сияқты азаматтық қоғам ұйымдары бұл жоспарды босқындарға салынатын қосымша салық деп бағалап, әділетсіз шешім екенін мәлімдеді. Ал Оксфорд университетінің Көші-қон обсерваториясының сарапшылары босқындар арасындағы жұмыспен қамту деңгейінің төмендігіне байланысты үкімет көздеген қаржыны толық жинау қиын болатынын айтады.
Оппозициядағы Консервативтік партия болса, Лейбористер үкіметін бұл саясатты өздерінің бастамасынан көшіріп алды деп айыптады.
