Сирия президенті Ахмет Шара елінің «бүгіні мен өткеніне лайық» қайта қалпына келтірудің жаңа кезеңіне енетінін уәде етті. “Бұл сөздерді ол Башар Асад режимінің құлағанына бір жыл толуын атап өту барысында айтты”, деп хабарлады Сирия Араб Жаңалықтар Агенттігі (SANA).

Дүйсенбі күні Дамаскідегі мешітте таң намазын оқып шыққаннан кейін сөйлеген сөзінде Шара сириялықтарға былай деді: «Кім болса да, қаншалықты мықты болса да, біздің жолымызға кедергі бола алмайды. Ешқандай кедергі бізді тоқтата алмайды және біз, Құдай қаласа, әрбір сынаққа бірге төтеп береміз.»

Президент келесі кезең «әлеуметтік осал топтарды қолдау және адамдар арасында әділеттілікті қамтамасыз ету» негізінде жүргізілетінін атап көрсетті.

Жақсы болашаққа

Сириялықтар 61 жылдық Баас режимінің құлағанына бір жыл толуын атап өтті. Олар елдерінің еркін, қауіпсіз мемлекетке айналып жатқанына деген үміттің жаңаруын байқайды.

Бас қала Дамаск тұрғындары биліктен кеткен Башар Асад режимі кезіндегі азаптар аяқталғанын айтып, жаңа әкімшілік Сирияны, әсіресе бостандық, экономика және қауіпсіздік салаларында жақсырақ болашаққа бастап әкеледі деп сенім білдіруде.

Асад режимі құлағаннан кейін құрылған жаңа үкімет электр қуаты мен мемлекеттік қызметкерлердің жалақылары сияқты негізгі қызметтерді көрсету, сондай-ақ азаматтардың күнделікті өміріне тікелей әсер ететін шешімдерді енгізу бағытында қадамдар басуда.

Сонымен қатар 14 жыл бойы жүргізілген бомбалаудан қатты зақымданған елдің электр желісін жөндеу және күту жұмыстары басталды.

Энергетика министрлігі негізгі электр станцияларындағы жұмыстар және Түркияның қолдауымен Әзербайжаннан алынған табиғи газ арқасында өндірістік қуат өскенін айтты.

Ал бұрынғы басқару кезінде электр күніне бірнеше сағат қана берілсе, жаңа шаралар оны тез арада күнделікті 8–10 сағатқа ұзартады.